ମୁଣ୍ଡ ନେଉଛି ମଦ, ନିଶାସକ୍ତ ଭାବେ ଡ୍ରାଇଭିଂ ଯୋଗୁଁ ବଢୁଛି ଦୁର୍ଘଟଣା
ନନ୍ଦିଘୋଷ ବ୍ୟୁରୋ: ମୁଣ୍ଡ ନେଉଛି ମଦ । ନିଶାଶକ୍ତ ଭାବେ ଡ୍ରାଇଭିଂ ଯୋଗୁଁ ବଢୁଛି ଦୁର୍ଘଟଣା । ସତ ଚେଷ୍ଟା ପରେ ବି ଅବସ୍ଥା ଯଥା ପୂର୍ବଂ ତଥା ପରଂ । ମେ’ ମାସରେ ଭୁବନେଶ୍ୱରରେ ଧରାପଡିଛି ୬ ଶହରୁ ଊର୍ଦ୍ଧ୍ବ ଡ୍ରଙ୍କ ଏଣ୍ଡ ଡ୍ରାଇଭ୍ କେସ । ସହରରେ ବଢୁଥିବା ହିଟ ଆଣ୍ଡ ରନ୍ ଏବେ ପାଲଟିଛି ମୁଣ୍ଡବିନ୍ଧା ।
ଖାରବେଳନଗର ଥାନା ଅଧୀନରେ ମଦ ପିଇ ଧରାପଡିଥିବା ବ୍ୟକ୍ତିଙ୍କ ସଂଖ୍ୟା ସର୍ବାଧିକ ଥିବା ବେଳେ ପଛକୁ ରହିଛି ଲକ୍ଷ୍ମୀସାଗର ଓ କ୍ୟାପିଟାଲ ପୋଲିସ ଷ୍ଟେସନ । ଡ୍ରଙ୍କ ଏଣ୍ଡ ଡ୍ରାଇଭ୍ କେସରେ ସାରା ଭୁବନେଶ୍ୱରରେ ଧରାପଡିଛି ୬୭୩ଟି ମାମଲା । ଯେଉଁଥିପାଇଁ ହିଟ ଆଣ୍ଡ ରନ ବଢୁଥିବା ମଧ୍ୟ ଦେଖାଯାଉଛି । ସାରା ଦେଶରେ ବାର୍ଷିକ ପାଖାପାଖି ୫୭ ହଜାର ହିଟ ଆଣ୍ଡ ରନ କେସ ସାମ୍ନାକୁ ଆସୁଥିବା ବେଳେ ଆଧିକାଂଶର କାରଣ ମଦ ପିଇ ଡ୍ରାଇଭିଂ ।
ହିଟ ଆଣ୍ଡ ରନ କେସରେ ସାରା ଦେଶରେ ଉତ୍ତରପ୍ରଦେଶ ଆଗରେ ଥିବା ବେଳେ ତା’ ପଛକୁ ରହିଛି ମଧ୍ୟପ୍ରଦେଶ ଓ ବିହାର । ଗୋଟିଏ ପଟେ ନିର୍ଦ୍ଧିଷ୍ଟ ସମୟ ସୀମା ମଧ୍ୟରେ ସହର ଭିତରକୁ ଭାରିଯାନ ପ୍ରବେଶ ନିଷେଧ କରାଯାଇଛି । କିନ୍ତୁ ପୋଲିସର ନିୟମ ଏବେ ପାଣିର ଗାର ପାଲଟିଛି । କେବଳ ଓଡ଼ିଶାରେ ପ୍ରତିଦିନ ୧୫ରୁ ୧୭ ଜଣଙ୍କ ମୃତ୍ୟୁ ହେଉଥିବା ବେଳେ ସାରା ଦେଶରେ ଦିନକୁ ଗଡୁଛି ପାଖାପାଖି ୫ ଶହ ମୁଣ୍ଡ । ସଡକ ସୁରକ୍ଷା ସପ୍ତାହ ପାଳନ ଆଳରେ ପଲ୍ୟୁସନ, ସ୍ପିଡ଼ ଡ୍ରାଇଭ, ରଙ୍ଗ ରୁଟ ଡ୍ରାଇଭ, ଟ୍ରିପଲ ରାଇଡିଂରେ କୋଟି କୋଟି ଟଙ୍କାର ଫାଇନ କଟୁଛି । କିନ୍ତୁ ପରିବହନ ବିଭାଗ, ପୋଲିସ ଓ ଏନଏଚଆଇ ମଧ୍ୟରେ ବିଭାଗୀୟ ତାଳମେଳ ରହୁ ନଥିବାରୁ ପାଣି ଫୋଟକା ଭଳି ଚାଲିଯାଉଛି ଜୀବନ । କାଗଜପତ୍ରରେ ସଡକ ସୁରକ୍ଷା ଚାଲିଥିବା ବେଳେ ଏହାର କୌଣସି ବାସ୍ତବତା ନଥିବା ଅଭିଯୋଗ ହେଉଛି ।
