ଭଣଜାକୁ ଭଲ ପାଇ ସଂସାର ଉଜାଡ଼ିଲା ମାଇଁ, ଏବେ ପୁଣି ଫେରିବାକୁ ବ୍ୟାକୁଳ
ପାଟକୁରା: ପରକୀୟ ପ୍ରୀତି ଭାଙ୍ଗି ଦେଲା ସୁନାର ସଂସାର । ଭଣଜା ପ୍ରେମରେ ପାଗଳୀ ହୋଇ ଫେରାର୍ ହୋଇଯାଇଥିବା ମାଇଁ ଏବେ ପୁଣି ଥରେ ଘରକୁ ଫେରିବାରୁ ମନ ବଳାଇଛି । ଏଭଳି ଘଟଣା ସାମ୍ନାକୁ ଆସିଛି କେନ୍ଦ୍ରାପଡ଼ା ଜିଲ୍ଲା ପାଟକୁରରା ଥାନା ଅଞ୍ଚଳରୁ । ମହିଳାଙ୍କ ଶ୍ୱଶୂର ଘର ଲୋକ ଏହାକୁ ବିରୋଧ କରିବାରୁ ପ୍ରେମିକ ତୁମୁଳକାଣ୍ଡ ଘଟାଇଛି । ମହିଳାଙ୍କ ଶ୍ୱଶୂରଙ୍କୁ ମଧ୍ୟ ମାଡ଼ ମାରିଛି ପ୍ରେମିକ ।
ପାଟକୁରା ଥାନା ରାମଚନ୍ଦ୍ରପୁରର ଜଣେ ବିବାହିତା ମହିଳାଙ୍କ ସହିତ ସମ୍ପର୍କୀୟ ଭଣଜା ରମାକାନ୍ତଙ୍କ ପ୍ରେମ ସମ୍ପର୍କ ଗଢ଼ି ଉଠିଥିଲା । ସ୍ୱାମୀ ଏହା ଜାଣିବା ପରେ ଗତ ବର୍ଷ ସ୍ତ୍ରୀକୁ ନେଇ ରାଜସ୍ଥାନ ଚାଲି ଯାଇଥିଲେ । ମାତ୍ର ପ୍ରେମିକ ଭଣଜା ସେଠାରେ ପହଞ୍ଚି ମାଇଁଙ୍କୁ ସାଙ୍ଗରେ ନେଇ ଆସିଥିଲେ । ପରେ ପାଟକୁରା ଥାନାରେ ହୋଇଥିବା ନିଷ୍ପତ୍ତି ଅନୁସାରେ ଦୁହେଁ ଏକାଠି ରହୁଥିଲେ । ମାତ୍ର ଏବେ ପ୍ରେମିକ ଜଣକ ମହିଳାଙ୍କୁ ତାଙ୍କ ଶ୍ୱଶୂର ଘରେ ଛାଡ଼ି ଦେବାକୁ କହିବାରୁ ମହିଳାଙ୍କ ଶ୍ୱଶୂର ଘର ଲୋକ ଏହାକୁ ବିରୋଧ କରିଥିଲେ ।
ଏଥିରେ ଉତକ୍ଷିପ୍ତ ହୋଇ ପ୍ରେମିକ ମହିଳାଙ୍କ ଶ୍ୱଶୂରଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି । ଶ୍ୱଶୂରଙ୍କୁ ବୋହୂର ପ୍ରେମିକ ମାଡ଼ ମାରୁଥିବାର ଭିଡିଓ ଭାଇରାଲ ହେବାରେ ଲାଗିଛି । ଏନେଇ ଥାନାରେ ଅଭିଯୋଗ ହୋଇଥିଲେ ମଧ୍ୟ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିନଥିବା ଅଭିଯୋଗ ହୋଇଛି ।
