ନନ୍ଦିଘୋଷ ବ୍ୟୁରୋ : ଲକ୍ଷ୍ମୌ ବିମାନ ବନ୍ଦରରେ ଅଘଟଣ। ସଠିକ୍ ଉଡାଣ ଭରି ପାରିଲା ନାହିଁ ଇଣ୍ଡିଗୋ ବିମାନ। ଫଳରେ ସେହି ବିମାନ ବଦଳରେ ଅନ୍ୟ ବିମାନରେ ଯାଇଛନ୍ତି ଯାତ୍ରୀ। ବିମାନରେ ସମାଜବାଦୀ ପାର୍ଟି ସାଂସଦ ଡିମ୍ପଲ ଯାଦବଙ୍କ ସମେତ ୧୫୧ ଯାତ୍ରୀ ଥିଲେ। ସମସ୍ତେ ସୁରକ୍ଷିତ ଥିବା ସୂଚନା ମିଳିଛି। ଗତକାଲି ଦିନ ୧୧ଟାରେ ଲକ୍ଷ୍ମୌ ବିମାନ ବନ୍ଦରରୁ ଦିଲ୍ଲୀ ଅଭିମୁଖେ ଉଡାଣ ଆରମ୍ଭ କରିଥିଲା ଇଣ୍ଡିଗୋ ବିମାନ। ତେବେ ରନୱେରେ ବିମାନ ଗଡ଼ିବା ମାତ୍ରେ ବିମାନରେ ସମସ୍ୟା ଦେଖାଦେଇଥିଲା। ସମ୍ଭାବ୍ୟ ବିପଦ ଆଶଙ୍କା କରି ପାଇଲଟ ବିମାନର ଏମର୍ଜେନ୍ସି ବ୍ରେକ ଲଗାଇଥିଲେ। କିଛି ଦୂର ଯିବା ପରେ ବିମାନ ସ୍ଥିର ରହିଥିଲା। ପରେ ସମସ୍ତ ୧୫୧ ଯାତ୍ରୀଙ୍କୁ ଓହ୍ଲାଇ ଦିଆଯାଇ ଅନ୍ୟ ବିମାନରେ ପଠାଯିବା ବ୍ୟବସ୍ଥା କରିଥିଲା। କିଛି ଦିନ ତଳେ ବିମାନରେ ଯାନ୍ତ୍ରିକ ତ୍ରୁଟି କାରଣରୁ ଆବୁଧାବି ଅଭିମୁଖୀ ବିମାନ କୋଚି ବିମାନ ବନ୍ଦରକୁ ଫେରିଥିଲା।
