ନନ୍ଦିଘୋଷ ବ୍ୟୁରୋ: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଶୁକ୍ରବାର ଦିନିକିଆ ସିରିଜର ଚତୁର୍ଥ ମୁକାବିଲା ବେ ଓଭାଲ୍ରେ ଖେଳାଯିବ । ଏହି ମ୍ୟାଚ୍ ଜିତି ଟିମ୍ ଇଣ୍ତିଆ ସିରିଜ ହାତେଇବା ନେଇ ଲକ୍ଷ୍ୟ ରଖିଛି । ଯଦି ଏପରି ହୁଏ ତେବେ ନ୍ୟୁଜିଲାଣ୍ଡ ୨୦୧୯ ପରେ ପ୍ରଥମ ଥର ନିଜ ମାଟିରେ ସିରିଜ ହାରିବ। କିଓ୍ୱି ଟିମ୍ ଏବେ ଲଗାତାର ୧୧ଟି ଘରୋଇ ଦିନିକିଆ ସିରିଜ୍ ହାତେଇଛି ।
ସିରିଜର ପ୍ରଥମ ଦୁଇଟି ମ୍ୟାଚ୍ ଜିତିଛି ଭାରତ । ତୃତୀୟ ମ୍ୟାଚ୍ ବର୍ଷା ଯୋଗୁଁ ବାତିଲ ହେବାରୁ ଦଳ ୫ ମ୍ୟାଚ୍ ବିଶିଷ୍ଟ ଏହି ସିରିଜରେ ୨-୦ରେ ଆଗୁଆ ରହିଛି। ଅନ୍ୟପଟେ ୭ ବର୍ଷ ତଳେ ଭାରତଠାରୁ ଶୃଙ୍ଖଳା ହାରିବା ପରଠୁ ନ୍ୟୁଜିଲାଣ୍ଡ ଘରୋଇ ମାଟିରେ ଲଗାତାର ୧୧ ଶୃଙ୍ଖଳାରେ ଅପରାଜେୟ ରହିଛି। ହେଲେ ଘରୋଇ ମାଟିରେ ଦୁଇଟି ମ୍ୟାଚ୍ ହାରିବା ପରେ ନ୍ୟୁଜିଲାଣ୍ଡର ଏହି ଅପରାଜେୟ ଧାରା ଭାଙ୍ଗିଛି । କେବଳ ସିରିଜରେ ପରାଜୟ ଟାଳିବା ଆଶାରେ ପଡ଼ିଆକୁ ଓହ୍ଲାଇବ ନ୍ୟୁଜିଲାଣ୍ଡ ।
ମୁକାବିଲାରେ ଭାରତୀୟ ଦଳର ନେତୃତ୍ୱ ନେବେ ଶ୍ରେୟସ ଆୟର । ଟେଷ୍ଟ୍ ସିରିଜ୍ ପାଇଁ ଶୁଭମନ ଗିଲ୍ ଦଳରୁ ବାଦ ପଡ଼ିଛନ୍ତି । କୋଚିଂ ଷ୍ଟାଫଙ୍କ ସମେତ କେଏଲ ରାହୁଲ ଓ ଅଂଶୁଲ କମ୍ବୋଜ ମଧ୍ୟ ଟେଷ୍ଟ୍ ପାଇଁ ପ୍ରସ୍ତୁତ ହେଉଛନ୍ତି । ଅର୍ଥାତ୍ ଚତୁର୍ଥ ଦିନିକିଆରେ ଶୁଭମନ, ରାହୁଲ ଓ ଅଂଶୁଲ ଖେଳିବେ ନାହିଁ । ଗିଲଙ୍କ ଅନୁପସ୍ଥିତିରେ ଇଷାନ କିଷାନ ଓ ରୋହିତ ଶର୍ମାଙ୍କ ସହ ଓପନିଂ କରିପାରନ୍ତି । ସେହିପରି ମହମ୍ମଦ ସିରାଜ ଟିମ୍ ରେ ସାମିଲ ହୋଇପାରନ୍ତି ବୋଲି ଚର୍ଚ୍ଚା ହେଉଛି । ସେପଟେ ଋତୁରାଜ ଗାଏକଓ୍ୱାଡଙ୍କୁ କେ.ଏଲ ରାହୁଲଙ୍କ ଜାଗାରେ ସ୍ଥାନ ମିଳିପାରେ । କୂଲଦୀପ ଯାଦବଙ୍କୁ ଦଳ ଅତିରିକ୍ତ ସ୍ପିନର୍ ଭାବେ ଖେଳାଇପାରେ। ତେବେ ଶ୍ରେୟସ ପ୍ରଥମ ଥର ପାଇଁ ଭାରତୀୟ ଦଳର ନେତୃତ୍ବ ନେବେ ।
