ଗାନ୍ଧିଜୀଙ୍କ ରାସ୍ତାରେ ସରପଞ୍ଚ ପ୍ରାର୍ଥୀ: ଖାଲି ପାଦରେ ଯାଇ କରୁଛନ୍ତି ଭୋଟ ଭିକ୍ଷା
ଯାଜପୁର: ସ୍ବାଧୀନତା ସଂଗ୍ରାମୀଙ୍କ ଗାଁରେ ଗାନ୍ଧିଜୀଙ୍କ ଭକ୍ତ । ଜାତିର ପିତା ମହାତ୍ମା ଗାନ୍ଧିଙ୍କ ନୀତି ଆଦର୍ଶରେ ଅନୁପ୍ରାଣିତ ସ୍ବାଧୀନତା ସଂଗ୍ରାମୀଙ୍କ ପୁଅ ଧନଞ୍ଜୟ ତ୍ରିପାଠୀ ସରପଞ୍ଚ ପ୍ରାର୍ଥୀ ଭାବେ ନାମାଙ୍କନପତ୍ର ଦାଖଲ କରିଛନ୍ତି ।
ଖାଲି ପାଦକୁ ଦେହରେ ଲୁଗା ଓ ଗାମୁଛା । ନିରାଡମ୍ବର ଭାବେ ଯାଇ ବଡଚଣା ବ୍ଲକ ବାଲିପଡ଼ିଆ ପଞ୍ଚାୟତର ସରପଞ୍ଚ ପ୍ରାର୍ଥୀ ଭାବେ ପ୍ରାର୍ଥିପତ୍ର ଦାଖଲ କରିଛନ୍ତି ଧନଞ୍ଜୟ । ସ୍ବାଧୀନତା ସଂଗ୍ରାମୀ ବୃନ୍ଦାବନ ତ୍ରିପାଠୀଙ୍କ ପୁଅ ହେଉଛନ୍ତି ଧନଞ୍ଜୟ ।
ମହାତ୍ମା ଗାନ୍ଧୀଙ୍କ ନୀତି ଆଦର୍ଶକୁ ପାଥେୟ କରି ଦୁର୍ନୀତି ମୁକ୍ତ ଆଦର୍ଶ ପଞ୍ଚାୟତ ଗଠନ କରିବା ଲକ୍ଷ୍ୟ ନେଇ ନିର୍ବାଚନ ମଇଦାନକୁ ଓହ୍ଲାଇଥିବା କହିଛନ୍ତି ଧନଞ୍ଜୟ । ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରି ନିଜ ପାରମ୍ପରିକ ପୋଷାକ ପିନ୍ଧି ଗାଁରେ ଘର ଘର ବୁଲି ଭୋଟ ଭିକ୍ଷା କରୁଛନ୍ତି । ସ୍ବାଧୀନତା ସଂଗ୍ରାମୀଙ୍କ ଗାଁ ଭାବେ ପରିଚିତ ବାଲିପଡ଼ିଆ ପଂଚାୟତର ଲୋକଙ୍କ ମତାମତ ନେଇ ସେ ନିର୍ବାଚନ ମଇଦାନକୁ ଓହ୍ଲାଇଥିବା କହିଛନ୍ତି ।
