ଥମିଲା ପ୍ରଚାର, ଦିନକ ପରେ ଭୋଟ୍; ଶେଷ ଦିନରେ ଝାରସୁଗୁଡ଼ାରେ ଝାଳବୁହା କ୍ୟାମ୍ପେନିଂ

ଝାରସୁଗୁଡ଼ା: ଥମିଲା ପ୍ରଚାର, ଦିନକ ପରେ ଭୋଟ୍ । ଶେଷ ଦିନରେ ଝାରସୁଗୁଡ଼ାରେ ଝାଳବୁହା କ୍ୟାମ୍ପେନିଂ ।  ସଭା, ଶୋଭାଯାତ୍ରାରେ କମ୍ପିଲା ସହର, ଗାଁ ଗାଁରେ ଡୋର୍ ଟୁ ଡୋର୍ ପ୍ରଚାର। ଭୋଟ୍ ମାଗିଲେ ପ୍ରାର୍ଥୀ, ନେତା, କର୍ମୀ । ଝାରସୁଗୁଡ଼ା ଉପନିର୍ବାଚନ ପାଇଁ ଆଜି ଶେଷ ହୋଇଛି ପ୍ରଚାର। ତିନି ପ୍ରମୁଖ ରାଜନୈତିକ ଦଳର ପ୍ରାର୍ଥୀ ଓ ନେତା ଶେଷ ଦିନରେ ଜୋରଦାର କ୍ୟାମ୍ପେନିଂ କରିଛନ୍ତି। ବିଜେଡି ପ୍ରାର୍ଥୀ ଦୀପାଳି ଦାସ ଝାରସୁଗୁଡ଼ା ସହରର ୩ନମ୍ଵର ଓ ୧୯ନମ୍ବର ୱାର୍ଡରେ ନିର୍ବାଚନ ପ୍ରଚାର କରିଛନ୍ତି ।

ମହିଳାମାନେ ଦୀପାଳିଙ୍କ ଉପରେ ପୁଷ୍ପ ବୃଷ୍ଟି କରି, ଉତ୍ତରୀୟ ଦେଇ, ମିଠା ଖୁଆଇ ସ୍ଵାଗତ ସମ୍ବର୍ଦ୍ଧନା କରିବା ସହ ସମର୍ଥନ ଜଣାଇଥିଲେ। ସବୁଠି ଦେଖିବାକୁ ମିଳିଛି ଦୀପାଳିଙ୍କ କ୍ରେଜ୍। ମାଟିର ଝିଅକୁ ମନଖୋଲା ସମର୍ଥନ ଜଣାଉଛନ୍ତି ଝାରସୁଗୁଡ଼ାବାସୀ। ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଝାରସୁଗୁଡ଼ାରେ ନିର୍ବାଚନୀ ସଭା ପରେ ବିଜେଡି କର୍ମୀଙ୍କ ଉତ୍ସାହ ଆହୁରି ବଢ଼ିଛି । ବିଜେଡି ପ୍ରାର୍ଥୀ ଦୀପାଳି ଦାସଙ୍କୁ ଝାରସୁଗୁଡ଼ାର ବିଭିନ୍ନ ସଂଗଠନ, ସମାଜ ସମର୍ଥନ ଘୋଷଣା କରିଛନ୍ତି ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବଚ୍ଛ ଶାସନ, ନିର୍ମଳ ଭାବମୂର୍ତ୍ତି, ଜନ୍ମଠାରୁ ମୃତ୍ୟୁ ପର୍ଯ୍ୟନ୍ତ ବିଭିନ୍ନ ଯୋଜନା, ବିକାଶ କାର୍ଯ୍ୟ ସହିତ ସ୍ବର୍ଗତ ନବକିଶୋର ଦାସଙ୍କ ଲୋକପ୍ରିୟତା ଯୋଗୁଁ ବିଜେଡି ପ୍ରାର୍ଥୀ ଦୀପାଳି ଦାସଙ୍କ ପାଇଁ ବିପୁଳ ଜନସମର୍ଥନ ଦେଖିବାକୁ ମିଳିଛି । ନିର୍ବାଚନର ଶେଷ ଦିନରେ କଂଗ୍ରେସ ଓ ବିଜେପି ପ୍ରାର୍ଥୀ ମଧ୍ୟ ନିର୍ବାଚନ ପ୍ରଚାର କରିଛନ୍ତି। କିନ୍ତୁ ତିନି ପ୍ରମୁଖ ରାଜନୈତିକ ଦଳର ପ୍ରାର୍ଥୀଙ୍କ ମଧ୍ୟରୁ ଜନସମର୍ଥନ ହାସଲରେ ବିଜେଡି ପ୍ରାର୍ଥୀ ଦୀପାଳି ଦାସ ବହୁ ଆଗରେ ଥିବା ରାଜନୈତିକ ସମୀକ୍ଷକ ମତ ଦେଇଛନ୍ତି ।