ବଲାଙ୍ଗିରରେ ବାଘ ଶିକାର, ଘରୁ ଜବତ ହେଲା କଲରାପତରିଆ ବାଘ ଛାଲ
ବଲାଙ୍ଗିର: ବଲାଙ୍ଗିର ବନ ବିଭାଗକୁ ବଡ଼ ସଫଳତା ମିଳିଛି । ସଇଁତଳା ଫରେଷ୍ଟ ରେଞ୍ଜ କଅଁସର ଗାଁରୁ କଲରାପତରିଆ ବାଘ ଛାଲ ଜବତ କରିଛି ବନ ବିଭାଗ । ସୋମବାର ବିଳମ୍ବିତ ରାତିରେ ବନ ବିଭାଗ ବାଘ ଛାଲକୁ କଅଁସର ଗାଁର ବିଶ୍ଵାମିତ୍ର ରଣାଙ୍କ ଘରୁ ଜବତ କରିଛି । ବିଶ୍ଵାମିତ୍ରକୁ ଅଟକ ରଖି ପଚରାଉଚରା କରୁଛି ବନ ବିଭାଗ ।
ବିଶ୍ୱାମିତ୍ରଙ୍କ ଘରେ ବାଘ ଛାଲ ଥିବା ନେଇ ବନ ବିଭାଗ ଖବର ପାଇ ବିଳମ୍ବିତ ରାତିରେ ରେଡ୍ କରିଥିଲା । ସେତେବେଳେ କିଛି ପାଇ ନଥିଲା ବନ ବିଭାଗ । ପରେ ବନ ବିଭାଗର କିଛି ଅଧିକାରୀ ଚତୁରତାର ସହ ସାଧା ପୋଷାକରେ ମୂଲଚାଲ କରିବା ସହ ବାଘଛାଲକୁ ଜବତ କରିବାରେ ସଫଳ ହୋଇଥିଲେ ।
ତେବେ ବିଶ୍ୱାମିତ୍ରଙ୍କ ପାଖକୁ ବାଘ ଛାଲ କେଉଁଠୁ ଆସିଲା ? ସେ ନିଜେ ବାଘ ଶିକାର କରିଛନ୍ତି କି ? ଯଦି ଶିକାର କରିଛନ୍ତି କେଉଁ ଜଙ୍ଗଲରେ ? ବାଘ ଛାଲ ରାକେଟରେ ଆଉ କିଏ କିଏ ସମ୍ପୃକ୍ତ । ଏବେ ଏସବୁର ତଦନ୍ତ କରୁଛି ବନ ବିଭାଗ ।
