ନନ୍ଦିଘୋଷ ବ୍ୟୁରୋ : ମହାନଦୀକୁ ନେଇ ଓଡ଼ିଶା-ଛତିଶଗଡ଼ ମଧ୍ୟରେ କିଛି ବିବାଦ ନାହିଁ। ଯାହା ସମସ୍ୟା ଅଛି, ତାହା ଖୁବ୍ ଶୀଘ୍ର ସମାଧାନ ହେବ ବୋଲି କହିଛନ୍ତି ଛତିଶଗଡ଼ର ମୁଖ୍ୟମନ୍ତ୍ରୀ। ଓଡ଼ିଶା-ଛତିଶଗଡ଼ ଓ କେନ୍ଦ୍ରରେ ବିଜେପି ସରକାର ଥିବାରୁ ଅନ୍ତଃ-ରାଜ୍ୟ ନଦୀ ଜଳ ବିବାଦର ସମାଧାନ ଶୀଘ୍ର ହେବ। ଉଭୟ ରାଜ୍ୟ କେନ୍ଦ୍ରୀୟ ଜଳ ଆୟୋଗରେ ଆପୋଷ ସମାଧାନ ପାଇଁ ସହମତ ହୋଇଛନ୍ତି। ଦୁଇ ରାଜ୍ୟର ମୁଖ୍ୟମନ୍ତ୍ରୀଙ୍କ ଓ ଅଧିକାରୀସ୍ତରୀୟ ବୈଠକ ସରିଛି। କେନ୍ଦ୍ରରେ ବିଜେପି ନେତୃତ୍ବାଧୀନ ସରକାର ଅନ୍ୟ ରାଜ୍ୟର ନଦୀ ଜଳ ବିବାଦକୁ ଯେପରି ସମାଧାନ କରିଛନ୍ତି, ଓଡ଼ିଶା-ଛତିଶଗଡ଼ ମଧ୍ୟରେ ସେପରି ସମାଧାନ ହେବ। ଦୁଇ ଦିନିଆ ସପରିବାର ଓଡ଼ିଶା ଗସ୍ତରେ ଥିବା ଛତିଶଗଡ଼ ମୁଖ୍ୟମନ୍ତ୍ରୀ ଓଡ଼ିଶା ମୁଖ୍ୟମନ୍ତ୍ରୀଙ୍କ ସହ ଘଣ୍ଟାଏ ଧରି ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି। ମହାନଦୀ ବିବାଦର ସମାଧାନ ଶୀଘ୍ର ହେବା ନେଇ ଛତିଶଗଡ଼ ମୁଖ୍ୟମନ୍ତ୍ରୀ କହିବା ପରେ ଏହାକୁ ନେଇ ବିରୋଧୀ କଂଗ୍ରେସ ଓ ବିଜେଡ଼ି ପ୍ରତିକ୍ରିୟା ରଖିଛନ୍ତି। ଦୀପାବଳି ପୂର୍ବରୁ ସମାଧାନ ହେବ ବୋଲି ଓଡ଼ିଶା ମୁଖ୍ୟମନ୍ତ୍ରୀ କହିଥିବା ବେଳେ ନିର୍ଦ୍ଦିଷ୍ଟ ଭାବେ କେବେ ସମାଧାନ ହେବ, ତାହା ଛତିଶଗଡ଼ ମୁଖ୍ୟମନ୍ତ୍ରୀ କୁହନ୍ତୁ ବୋଲି ଦାବି କରିଛନ୍ତି ଦୁଇ ଦଳ। ଏହି ପ୍ରସଙ୍ଗରେ ମହାନଦୀ ବଞ୍ଚାଅ ଅଭିଯାନ ଛତିଶଗଡ଼ ସରକାରଙ୍କୁ ଘେରିବାକୁ ଉଦ୍ୟମ କରିଛି। ବନ୍ୟା ବେଳେ କଲମା ବ୍ୟାରେଜର ସବୁ ଗେଟ ନ ଖୋଲିବାକୁ ମହାନଦୀ ବଞ୍ଚାଅ ଅଭିଯାନ ଅନୁରୋଧ କରିଥିଲେ ବି ଛତିଶଗଡ଼ ଏହା ମାନିନଥିଲା। ଏପରିକି ଅଦାଲତରେ ଭ୍ରମାତ୍ମକ ତଥ୍ୟ ଦେଇ ଓଡ଼ିଶାର ସ୍ବାର୍ଥକୁ ଆଘାତ ପହଞ୍ଚାଇବାକୁ ଛତିଶଗଡ଼ ଉଦ୍ୟମ କରୁଛି। କାହା ସ୍ବାର୍ଥରେ ଛତିଶଗଡ଼ ଏତେ ସବୁ ବ୍ୟାରେଜ କରିଛି ବୋଲି ଅଭିଯାନର ଆବାହକ ସୁଦର୍ଶନ ଦାସ ପ୍ରଶ୍ନ କରିଛନ୍ତି।
