ନନ୍ଦିଘୋଷ ବ୍ୟୁରୋ: ମଣିପୁରରେ ପୁଣି ହିଂସା। ଚୁରାଚାନ୍ଦପୁର ଜିଲ୍ଲାରେ ହମାର ଆଦିବାସୀ ସଂଗଠନ ନେତାଙ୍କୁ କେତେକ ଅଜଣା ବ୍ଯକ୍ତି ଆକ୍ରମଣ କରିବା ପରେ ଜିଲ୍ଲାରେ ଉତ୍ତେଜନା ସୃଷ୍ଟି ହୋଇଛି। ଫଳରେ ଜିଲ୍ଲାରେ କର୍ଫ୍ୟୁ ଜାରି କରାଯାଇଛି। ଚୁରାଚାନ୍ଦପୁର କୁକି ବହୁଳ ହୋଇଥିବାବେଳେ ଆକ୍ରମଣ ଘଟଣାକୁ ନେଇ ଜିଲ୍ଲାରେ ଉତ୍ତ୍ୟକ୍ତ ହୋଇଛନ୍ତି ହମାର ଆଦିବାସୀ। ହମାର ସମ୍ପ୍ରଦାୟ ସାଧାରଣ ସମ୍ପାଦକ ରିଚାର୍ଡ ହମାରଙ୍କ ଗାଡି ସହ ଏକ ଦୁଇ ଚକିଆ ଯାନର ମୁହାଁମୁହିଁ ସ୍ଥିତିକୁ ନେଇ ଉତ୍ତେଜନା ତୀବ୍ର ହୋଇଥିଲା। ଏହି ଘଟଣା ପରେ ହମାର ଗୋଷ୍ଠୀ ନେତାଙ୍କୁ କିଛି ଲୋକ ଆକ୍ରମଣ କରିଥିବା ଅଭିଯୋଗ ହୋଇଥିଲା। ପରେ ପରେ ଚୁରାଚାନ୍ଦପୁରରେ ଶହ ଶହ ହମାର ସଂଗଠନ ସଦସ୍ୟ ରାସ୍ତାକୁ ଆସି ଆନ୍ଦୋଳନ କରିଥିଲେ। ଏପରିକି ବିଭିନ୍ନ ସ୍ଥାନରେ ପଥରମାଡ କରିଥିଲେ। ପରିସ୍ଥିତି ଅଧିକ ଉତ୍ତେଜନାପୂର୍ଣ୍ଣ ହେବାରୁ ସାରା ଜିଲ୍ଲାରେ କର୍ଫ୍ୟୁ ଜାରି କରାଯାଇଛି। ବିଭିନ୍ନ ସ୍ଥାନରେ ପୋଲିସ ବାହିନୀ ମୁତୟନ କରାଯାଇଛି।
