ମୁର୍ଶିଦାବାଦରେ ଟ୍ରାକ୍ଟର-ଡମ୍ପର ଧକ୍କା : ୫ ମୃତ

ନନ୍ଦିଘୋଷ ବ୍ୟୁରୋ: ପଶ୍ଚିମବଙ୍ଗ ମୁର୍ଶିଦାବାଦରେ ଟ୍ରାକ୍ଟର-ଡମ୍ପର ଧକ୍କା । ଦୁର୍ଘଟଣାରେ ୫ ମୃତ, ୧୦ରୁ ଅଧିକ ଗୁରୁତର । କାନ୍ଦି ଥାନା ଗୋରକାନ୍ ପାୱାର ହାଉସ୍ ଛକରେ ଘଟିଛି ଦୁର୍ଘଟଣା । ଆହତଙ୍କୁ ମୁର୍ଶିଦାବାଦ ମେଡିକାଲ୍ କଲେଜ୍ ହସ୍ପିଟାଲରେ ଭର୍ତ୍ତି କରାଯାଇଛି । ସେମାନଙ୍କ ମଧ୍ୟରୁ କେତେକଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁ ସଂଖ୍ୟା ଆହୁରି ବଢ଼ିପାରେ ବୋଲି ଆଶଙ୍କା କରାଯାଉଛି । ୨୦ ଜଣ ତୀର୍ଥଯାତ୍ରୀ ବୀରଭୂମର ବାଲୁକା ଅଞ୍ଚଳରୁ ଗାଧୋଇ ଫେରୁଥିବା ସମୟରେ ଟ୍ରାକ୍ଟରଟି ଏକ ଡମ୍ପର ସହିତ ଧକ୍କା ହୋଇଥିଲା । ଦୁର୍ଘଟଣା ପରେ ଟ୍ରାକ୍ଟରଟି ଘଟଣାସ୍ଥଳେ ଓଲଟି ପଡ଼ିଥିଲା । ଫଳରେ ଡ୍ରାଇଭର ସମେତ ୫ ଜଣଙ୍କର ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୩ ଜଣ ମହିଳା ଅଛନ୍ତି । ସମସ୍ତ ମୃତକ ଏବଂ ଆହତ ବ୍ୟକ୍ତି ମୁର୍ଶିଦାବାଦର ହରିହର ପାରା ଥାନା ଅନ୍ତର୍ଗତ ରୁକୁନପୁର ଅଞ୍ଚଳର ବୋଲି ଜଣାପଡିଛି ।