ନନ୍ଦିଘୋଷ ବ୍ୟୁରୋ: ସିଇଓ ପଦରୁ ଇସ୍ତଫା ଦେଲେ ଏଭିଡିଆର ଜେନସେନ୍ ହୁଆଙ୍ଗ। ଏ ନେଇ କମ୍ପାନୀ ପକ୍ଷରୁ ସମ୍ପୂର୍ଣ୍ଣ ବିବୃତି ଜାରି ହୋଇଛି । ଏଥିରେ କୁହାଯାଇଛି, ଜେନସେନ୍ ହୁଆଙ୍ଗ କମ୍ପାନୀର ସଭାପତି, ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ CEO ଓ ବୋର୍ଡ ସଦସ୍ୟ ପଦରୁ ଇସ୍ତଫା ଦେଇଛନ୍ତି। ତାଙ୍କ ସ୍ଥାନରେ କମ୍ପାନୀର ବର୍ତ୍ତମାନର ମୁଖ୍ୟ ଆର୍ଥିକ ଅଧିକାରୀ ବା CFO କୋଲେଟ କ୍ରେସ୍ ଅସ୍ଥାୟୀ ଭାବେ ସିଇଓ ଦାୟିତ୍ୱ ତୁଲାଇବେ।
ଚୀନର ଜଣେ ସନ୍ଦିଗ୍ଧ ଗୁପ୍ତଚର ଆଲିସ୍ ହୁଆଙ୍ଗଙ୍କ ସହ ପରକୀୟା ପ୍ରୀତି ନେଇ ବିବାଦରେ ଥିଲେ ଜେନସେନ୍ । ସେ ଏହାକୁ ସ୍ଵୀକାର ବି କରିଥିଲେ। ଏହାକୁ ନେଇ ସାରା ବିଶ୍ଵରେ ହଲଚଲ ହୋଇଥିଲା। ଏହି ବିବାଦ ପରେ ପଦ ଛାଡ଼ିବା ପାଇଁ ତାଙ୍କ ଉପରେ ଚାପ ବଢୁଥିଲା। ସ୍ଥାୟୀ ଉତ୍ତରାଧିକାରୀ ନିଯୁକ୍ତ ହେବା ପର୍ଯ୍ୟନ୍ତ କ୍ରେସ୍ ଅସ୍ଥାୟୀ ସିଇଓ ଦାୟିତ୍ୱ ସହିତ କାର୍ଯ୍ୟନିର୍ବାହୀ ଉପସଭାପତି ଓ ସିଏଫଓ ପଦବୀରେ ମଧ୍ୟ ରହିବେ। ନିର୍ଦ୍ଦେଶକ ମଣ୍ଡଳୀ ଜଣେ ସ୍ଥାୟୀ ସିଇଓଙ୍କ ସନ୍ଧାନ ଆରମ୍ଭ କରିଛି । ଏଥିପାଇଁ କମ୍ପାନୀର ଆଭ୍ୟନ୍ତରୀଣ ଓ ବାହ୍ୟ ପ୍ରାର୍ଥୀଙ୍କୁ ବିଚାର କରାଯିବ। ୨୦୧୩ ସେପ୍ଟେମ୍ବରରେ ଏନଭିଡିଆରେ ଯୋଗଦେବା ପରଠାରୁ କୋଲେଟ୍ କ୍ରେସ୍ କମ୍ପାନୀର କାର୍ଯ୍ୟନିର୍ବାହୀ ଉପସଭାପତି ଓ ମୁଖ୍ୟ ଆର୍ଥିକ ଅଧିକାରୀ ଭାବେ କାର୍ଯ୍ୟ କରିଆସୁଛନ୍ତି। ତାଙ୍କ କାର୍ଯ୍ୟକାଳ ମଧ୍ୟରେ ସେ କମ୍ପାନୀର ଆର୍ଥିକ ବିଭାଗର ନେତୃତ୍ୱ ନେବା ସହ ଏନଭିଡିଆର ଅଭିବୃଦ୍ଧି ଓ ବିକାଶରେ ପ୍ରମୁଖ ଭୂମିକା ଗ୍ରହଣ କରିଛନ୍ତି।
ଏନେଇ ଏନଭିଡିଆ ପକ୍ଷରୁ କୁହାଯାଇଛି, କମ୍ପାନୀର ଗୋପନୀୟ ତଥ୍ୟ କିମ୍ବା ଆମେରିକାର ଜାତୀୟ ସୁରକ୍ଷା ସହ କୌଣସି ସାଲିସ୍ ହୋଇଥିବାର ପ୍ରମାଣ ନାହିଁ । ତଥାପି ଏହି ମାମଲାର ସମସ୍ତ ଦିଗକୁ ନେଇ ସ୍ୱାଧୀନ ତଦନ୍ତ କରାଯିବ । ଏନଭିଡିଆର ଅତ୍ୟାଧୁନିକ କମ୍ପ୍ୟୁଟର ଚିପ ଗୁଡ଼ିକୁ ବେଆଇନ ଭାବେ ଚୀନକୁ ପଠାଯାଉଥିବା ଅଭିଯୋଗ ହୋଇଥିଲା । ତେବେ ଏପରି ରପ୍ତାନିର କୌଣସି ପ୍ରମାଣ ନଥିବା ମେଗାସ୍ପିଡ୍ ପକ୍ଷରୁ କୁହାଯାଇଥିଲା । ସିଙ୍ଗାପୁର ମଧ୍ୟ ଏହି ଅଭିଯୋଗର ତଦନ୍ତ କରୁଛି ।
