ନନ୍ଦିଘୋଷ ବ୍ୟୁରୋ: ଆଜି ବିଜେଡିର ରାଇଘର ବନ୍ଦ ଡ଼ାକରା । ରାଜ୍ୟ ସରକାର ବିରୋଧରେ ୧୨ ଘଣ୍ଟିଆ ବନ୍ଦ ପାଳନ ସହ ଆନ୍ଦୋଳନ ତୀବ୍ରତର ପାଇଁ ସରକାରଙ୍କୁ ଚେତାବନୀ ଦେଇଛି ବିଜେଡି। ଆନ୍ଦୋଳନ ବେଳେ ଅତ୍ୟାବଶ୍ୟକ ସେବା ଆମ୍ବୁଲାନ୍ସ ଓ ଅଗ୍ନିଶମ ବାହିନୀର ଗାଡି ଓ ଔଷଧ ଦୋକାନକୁ ଛାଡି ସମସ୍ତ ଦୋକାନ ବଜାର ବନ୍ଦ ପାଇଁ ବିଜେଡି ପକ୍ଷରୁ ଲୋକଙ୍କୁ ଅପିଲ କରାଯାଇଛି। ରାଇଘର ଅଂଚଳର ୩୪୪ ଜଣ ଚାଷୀ ସରକାରୀ ନିୟମ ଅନୁସାରେ ରେଜିଷ୍ଟ୍ରେସନ ପରେ ଧାନ ଚାଷ କଲେ।୧୫ ଫେବୃଆରୀରୁ ଧାନ ବିକିବା ପାଇଁ ମେସେଜ ଆସିଲା। ମଣ୍ଡିରେ ଧାନ ଦେଇ ରସିଦ ପାଇଲେ, କିନ୍ତୁ ଆଜି ପର୍ଯ୍ୟନ୍ତ ଧାନ ବିକ୍ରି ଟଙ୍କା ପାଇଲେ ନାହିଁ। ସରକାରୀ ନିୟମ ଅନୁସାରେ ୨୪ ଘଣ୍ଟାରୁ ୪୮ ଘଣ୍ଟା ଭିତରେ ଚାଷୀଙ୍କୁ ଧାନ ବିକ୍ରିର ଟଙ୍କା ମିଳିବା କଥା।୨୩ ଏପ୍ରିଲରେ ସରକାରୀ ଅଧିକାରୀ ଚାଷୀଙ୍କ ସହ ଆଲୋଚନା ପରେ ବି ଚାଷୀ ଟଙ୍କା ପାଇଲେ ନାହିଁ। କିଛି ମିଲ୍ ମାନଙ୍କୁ ଟାର୍ଗେଟ ଦିଆ ଯାଇନାହିଁ ତେଣୁ ଚାଷୀ ଟଙ୍କା ପାଇ ପାରୁ ନାହାନ୍ତି। ଚାଷୀଙ୍କ ଭୁଲ୍ ରହିଲା କେଉଁଠି ବୋଲି ବିଜେଡି ପ୍ରଶ୍ନ କରିଛି। ବିଜେପିର ଚାଷୀ ମାରଣ ନୀତି ବିରୋଧରେ ଆନ୍ଦୋଳନ ତୀବ୍ରତର ହେବ। ଆଜି ରାଇଘରରେ ପାଳନ ହେବ କଳାଦିବସ। ଚାଷୀଙ୍କର ସାଢ଼େ ଚାରିକୋଟି ଟଙ୍କା ଏଯାଏଁ ମିଳିନାହିଁ। ୬ ଦିନ ହେଲା ଭୁବନେଶ୍ୱରରେ ଚାଷୀ ଆନ୍ଦୋଳନ କରୁଛନ୍ତି। କିନ୍ତୁ ମୁଖ୍ୟମନ୍ତ୍ରୀ ଏ ବିଷୟ ନବୁଝିବା ଦୁର୍ଭାଗ୍ୟଜନକ ବୋଲି କହିଛି ବିଜେଡି।
