ରାଜ୍ୟ କ୍ୟାବିନେଟରେ ୬ଟି ବିଭାଗର ୮ଟି ପ୍ରସ୍ତାବକୁ ମଞ୍ଜୁରୀ
ନନ୍ଦିଘୋଷ ବ୍ୟୁରୋ: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ରାଜ୍ୟ କ୍ୟାବିନେଟର ୪୨ତମ ବୈଠକ ଅନୁଷ୍ଠୀତ ହୋଇଯାଇଛି । ଏଥିରେ ୬ଟି ବିଭାଗର ୮ଟି ପ୍ରସ୍ତାବକୁ ମଞ୍ଜୁରୀ ମିଳିଛି । ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ ଏବଂ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗର ୨ଟି ଲେଖାଏଁ ପ୍ରସ୍ତାମକୁ ଅନୁମୋଦନ ମିଳିଛି । ସେହିପରି, ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ, ପଂଚାୟତ ଓ ପାନୀୟ ଜଳ ବିଭାଗ, ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ଏବଂ ବିଧି ବିଭାଗର ଗୋଟିଏ ଲେଖାଏଁ ପ୍ରସ୍ତାବ ଅନୁମୋଦିତ ମିଳିଛି ।
ବିଧି ଆୟୋଗ ସଦସ୍ୟଙ୍କ ପାରିତୋଷିକ ୭୫ ହଜାରରୁ ଲକ୍ଷେ ୨୦ ହଜାର ବୃଦ୍ଧି ପ୍ରସ୍ତାବକୁ କ୍ୟାବିନେଟ ମଞ୍ଜୁର କରିଛି । ରାଜ୍ୟର ବିଭିନ୍ନ ଜାଗାର ଇଂରାଜୀ ବନାନ ସଂଶୋଧନ ନିଷ୍ପତ୍ତିକୁ କ୍ୟାବିନେଟ ମୋହର ମାରିଛି । ସଂଶୋଧିତ ନାମକୁ ସବୁ ସରକାରୀ କାମରେ ବ୍ୟବହାର କରିବାକୁ ଗ୍ୟାଜେଟ ମାଧ୍ୟମରେ କେନ୍ଦ୍ର ସରକାରଙ୍କ ଗୃହ ମନ୍ତ୍ରାଳୟକୁ ଅବଗତ କରାଯିବ । ପିଏମ ସ୍ୱନିଧି ଯୋଜନାରେ ଉଠା ଦୋକାନୀଙ୍କୁ ସହଜରେ ଋଣ ଦେବା ପାଇଁ ଆବଶ୍ୟକୀୟ ଚୁକ୍ତିନାମା ଷ୍ଟାମ୍ପ ଡିଉଟି ଛାଡ଼ ପ୍ରସ୍ତାବକୁ କ୍ୟାବିନେଟ ମଞ୍ଜୁର କରିଛି । ଏହି ଯୋଜନାରେ ଉଠା ଦୋକାନୀଙ୍କୁ ୧୫ ହଜାରରୁ ୫୦ ହଜାର ଟଙ୍କା ଯାଏଁ ଋଣ ବ୍ୟବସ୍ଥା ହେଇଛି । ନଗର ଉନ୍ନୟନ ବିଭାଗର ଭୁବନେଶ୍ୱରରେ ଥିବା ଟାଉନ ପ୍ଲାନିଂ 1, 2, 3 ଅଂଚଳର ସ୍ବେରେଜ ବ୍ୟବସ୍ଥା ପାଇଁ ୧୭୫ କୋଟିର ପ୍ରକଳ୍ପକୁ କ୍ୟାବିନେଟ ମଞ୍ଜୁର କରିଛି ।
କେନ୍ଦ୍ରୀୟ ଯୋଜନା ବିକଶିତ ଭାରତ-ଜି ରାମ ଜି ପ୍ରକଳ୍ପ ଓଡ଼ିଶାରେ ଲାଗୁ କରିବା ପାଇଁ କ୍ୟାବିନେଟ ନିଷ୍ପତ୍ତି ନେଇଛି । ସରକାରୀ କର୍ମଚାରୀଙ୍କ ପାଇଁ ବାର୍ଷିକ ସମ୍ପତ୍ତି ତାଲିକା ବାଧ୍ୟତାମୂଳକ ଥିବା ବେଳେ ଏହାର ଉଲ୍ଲଂଘନ ହେଲେ କୌଣସି ଦଣ୍ଡ ବ୍ୟବସ୍ଥା ନଥିଲା । କ୍ୟାବିନେଟ ସରକାରୀ କର୍ମଚାରୀଙ୍କ କଣ୍ଡକ୍ଟ ରୁଲରେ ସଂଶୋଧନ କରି ପ୍ରତିବର୍ଷ ଜାନୁଆରୀ ୩୧ ସୁଦ୍ଧା ସମ୍ପତ୍ତି ତାଲିକା ନ ଦେଲେ ବିଭାଗୀୟ କାର୍ଯ୍ୟାନୁଷ୍ଠାନ ନିଆଯିବ ବୋଲି ନିୟମରେ ସଂଶୋଧନ କରାଯାଇଛି । ହସ୍ତତନ୍ତ ବିଭାଗ ଅଧୀନରେ ବନ୍ଦ ବା ଅଚଳ ହୋଇ ପଡ଼ିଥିବା ବିଭିନ୍ନ ସୂତାକଳ ୟୁନିଟକୁ ସଚଳ ଓ ପୁନରୁଦ୍ଧାର ପାଇଁ ଆବଶ୍ୟକ ବଜେଟ ବ୍ୟବସ୍ଥାକୁ କ୍ୟାବିନେଟ ଅନୁମୋଦନ କରିଛି ।
