ପୋଷାକ ଉତ୍ପାଦନ କାରଖାନା ପାଇଁ ଭିତ୍ତିପ୍ରସ୍ତର ସ୍ଥାପନ କଲେ ମୁଖ୍ୟମନ୍ତ୍ରୀ
ନନ୍ଦିଘୋଷ ବ୍ୟୁରୋ: କେନ୍ଦୁଝରରେ ପୋଷାକ ଉତ୍ପାଦନ କାରଖାନା ନିମନ୍ତେ ଭିତ୍ତିପ୍ରସ୍ତର ସ୍ଥାପନ କଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ହିଣ୍ଡାଲ୍କୋ ଏହାର ସିଏସ୍ଆର ପ୍ରୟାସ ଅଧୀନରେ ୧୦୦ କୋଟି ଟଙ୍କା ପୁଞ୍ଜିନିବେଶରେ ଏହି ପ୍ରକଳ୍ପ ନିର୍ମାଣ ହେବ । ପ୍ରକଳ୍ପ ଦ୍ବାରା ପ୍ରାୟ ୧୨୦୦ ନିଯୁକ୍ତି ସୁଯୋଗ ସୃଷ୍ଟି ହେବ । ମୁଖ୍ୟମନ୍ତ୍ରୀ କେନ୍ଦୁଝରର ବଳଭଦ୍ରପୁରଠାରେ ଏହି ଆଧୁନିକ ପୋଷାକ ଉତ୍ପାଦନ କାରଖାନାର ଭିତ୍ତିପ୍ରସ୍ତର ସ୍ଥାପନ କରିଛନ୍ତି ।
ଆଦିତ୍ୟ ବିର୍ଲା ଗ୍ରୁପ୍ର ଛାମୁଆ ଧାତୁ କମ୍ପାନୀ ହିଣ୍ଡାଲ୍କୋ ଇଣ୍ଡଷ୍ଟ୍ରିଜ ଲିମିଟେଡର ସିଏସଆର ପାଣ୍ଠିରେ ଏହି ପ୍ରକଳ୍ପ ହେବ । ରାଜ୍ୟ ସରକାର ଏହି ପ୍ରକଳ୍ପ ନିମନ୍ତେ ଜମି ଯୋଗାଇ ଦେଇଛନ୍ତି । ଏହି କାରଖାନା ଆଧୁନିକ ଭିତ୍ତିଭୂମି ଏବଂ ଉନ୍ନତ ଉତ୍ପାଦନ ବ୍ୟବସ୍ଥାରେ ସମ୍ପନ୍ନ ହେବ । ଓଡ଼ିଶାର ବିକାଶ ଦିଗରେ ହିଣ୍ଡାଲ୍କୋର ନିରନ୍ତର ଅବଦାନକୁ ପ୍ରଶଂସା କରିଥିଲେ ମୁଖ୍ୟମନ୍ତ୍ରୀ । ଲୁଇ ଫିଲିପ, ଭାନ ହୁ୍ୟସେନ୍, ଅଲେନ ସୋଲି ଏବଂ ପିଟର ଇଂଲଣ୍ଡ ଭଳି ବ୍ରାଣ୍ଡ୍ଗୁଡିକର ପୋଷାକ ଏଠାରେ ଉତ୍ପାଦିତ ହେବ ଏବଂ ବିଶ୍ୱ ବଜାରକୁ ବିକ୍ରି ନିମନ୍ତେ ପଠାଯିବ ।
