ନନ୍ଦିଘୋଷ ବ୍ୟୁରୋ : ରାସ୍ତା କଡ଼ରେ ପଡ଼ିଛି କୁଢ଼କୁଢ଼ ଆବର୍ଜନା । ମୁକୁଳା ପଡ଼ିଛି ଡ୍ରେନ । ଦୁର୍ଗନ୍ଧରେ ଫାଟି ପଡୁଛି ନାକ । ହେଲେ ସଫା ହେବାର ନାଁ ନାହିଁ ।… ଏ ହେଉଛି ଅନୁଗୋଳ ପୌରାଞ୍ଚଳ ଶିମିଳିପଡ଼ା ସ୍ଥିତ ୧ ନମ୍ବର ୱାର୍ଡର ଦୃଶ୍ୟ । ମରାମତି ଅଭାବରୁ ଏଠାକାର ଗଳିକନ୍ଦି ରାସ୍ତା ସମ୍ପୂର୍ଣ୍ଣ ନଷ୍ଟ ହୋଇଗଲାଣି । ରାସ୍ତାର ଦୁରାବସ୍ଥା ପାଇଁ ଅନେକ ସମୟରେ ଘଟୁଛି ଛୋଟବଡ଼ ଦୁର୍ଘଟଣା । କେବଳ ରାସ୍ତା ନୁହେଁ, ଅଳିଆ ଆବର୍ଜନାରେ ଡ୍ରେନ ସବୁ ପୋତି ହୋଇଗଲାଣି । ଫଳରେ ସାମାନ୍ୟ ବର୍ଷା ହେଲେ କୃତ୍ରିମ ବନ୍ୟା ସୃଷ୍ଟି ହେଉଛି ଏବଂ ମଇଳା ପାଣି ଲୋକଙ୍କ ଘରେ ପଶୁଛି । ଖାଲି ସେତିକି ନୁହେଁ ୱାର୍ଡରେ ଆଲୋକୀକରଣ ବ୍ୟବସ୍ଥା ବି ନାହିଁ । ସନ୍ଧ୍ୟା ହେଲେ ଚୋରି, ଛିନତାଇ ଭଳି ଅସାମାଜିକ କାର୍ଯ୍ୟକଳାପ ବୃଦ୍ଧି ପାଉଛି । ଯାହା ମହିଳା ଓ ବରିଷ୍ଠ ନାଗରିକଙ୍କ ସୁରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି କରିଛି।…
ସମସ୍ୟା ସଂପର୍କରେ ସ୍ଥାନୀୟ ‘ଏମ୍.ଆର୍ ସୋସାଇଟି’ ପକ୍ଷରୁ ଜିଲ୍ଲାପାଳ ଓ ପୌର ନିର୍ବାହୀ ଅଧିକାରୀଙ୍କୁ ବାରମ୍ବାର ଲିଖିତ ଦାବି ପତ୍ର ଦିଆଯାଇଛି । ହେଲେ ଫଳ ଶୂନ । ସେପଟେ ସଫେଇ ଦେଇଛନ୍ତି ପୌର ନିର୍ବାହୀ ଅଧିକାରୀ।…
ନର୍କଯନ୍ତ୍ରଣା ଭୋଗୁଥିବା ୧୫୦୦ରୁ ଊର୍ଦ୍ଧ୍ୱ ପରିବାରକୁ କେବେ ମିଳୁଛି ମୌଳିକ ସୁବିଧା ? ତାହା ଦେଖିବାକୁ ବାକି ରହିଲା ।
