ସ୍କୁଲ ସାମ୍ନାରେ ନାଳ ନର୍ଦ୍ଦମା । ମୁକୁଳା ପଡିଛି ଡ୍ରେନ । ଚାରିଆଡେ ପଡିଛି କୁଢକୁଢ ଅଳିଆ ଆବର୍ଜନା । ଦୁର୍ଗନ୍ଧରେ ଫାଟି ପଡୁଛି ପରିବେଶ । ଅସ୍ଵାସ୍ଥ୍ୟକର ପରିବେଶରେ ପାଠପଢୁଛନ୍ତି ଛାତ୍ରଛାତ୍ରୀ । ଏ ହେଉଛି ଗଞ୍ଜାମ ସାନଖେମୁଣ୍ଡି ବ୍ଲକ କଉଡିଆର ଉନ୍ନୀତ ଉଚ୍ଚ ବିଦ୍ୟାଳୟର ଦୃଶ୍ୟ । ବିଦ୍ୟାଳୟ ଚାରିପାଖେ କୁଢକୁଢ ଅଳିଆ ଗଦା ହୋଇଛି । ଯାହା ଫଳରେ ଡ୍ରେନ ଜାମ ହୋଇ ନର୍ଦ୍ଦମା ପାଣି ରାସ୍ତା ଉପରେ ଲହଡ଼ି ମାରୁଛି । ମଶା ମାଛିଙ୍କ ବଂଶ ବୃଦ୍ଧି ହେଉଛି । ଅସ୍ଵାସ୍ଥ୍ୟକର ପରିବେଶ ଯୋଗୁଁ ଡେଙ୍ଗୁ, ମ୍ୟାଲେରିଆ, ଫାଇଲେରିଆ ଭଳି ସଂକ୍ରମଣ ଶିକାର ହେଉଛନ୍ତି ଛାତ୍ରଛାତ୍ରୀ । ଯାହାକୁ ନେଇ ଅଭିଭାବକ ମହଲରେ ତୀବ୍ର ଅସନ୍ତୋଷ ଦେଖାଦେଇଛି ।
ସ୍କୁଲ ଚତୁଃପାର୍ଶ୍ଵରେ ଦୀର୍ଘ ବର୍ଷ ଧରି ଅଳିଆ ଆବର୍ଜନା ପଡିରହିଛି । ନାଳ ନର୍ଦ୍ଦମା ପାଣି ରାସ୍ତାରେ ଲହଡି ଭାଙ୍ଗୁଥିବା ବେଳେ ସେଥିରେ ପୋକ ସାଲୁବାଲୁ ହେଉଛନ୍ତି । ସ୍ଥାନୀୟ ପ୍ରଶାସନ ଶୀଘ୍ର ଏଥିପ୍ରତି ଦୃଷ୍ଟି ଦେଇ ଅଳିଆ ଆବର୍ଜନା ସଫା କରିବାକୁ ଦାବି ହୋଇଛି । ଅନ୍ୟପଟେ ଗ୍ରାମବାସୀ ହିଁ ଅଳିଆ ପକାଉଥିବାରୁ ଏଭଳି ସ୍ଥିତି ଉପୁଜୁଛି ବୋଲି କହିଛନ୍ତି ପ୍ରଧାନ ଶିକ୍ଷକ । କେବେ ବିଦ୍ୟାଳୟ ପାର୍ଶ୍ଵରୁ ଅଳିଆ ଆବର୍ଜନା ସଫା ହେଉଛି ? ଛାତ୍ରଛାତ୍ରୀ କେବେ ସ୍ଵାସ୍ଥ୍ୟକର ପରିବେଶରେ ପାଠ ପଢୁଛନ୍ତି ? ତାକୁ ହିଁ ଅପେକ୍ଷା ।
