ପହଲଗାଓଁକୁ କେମିତି ଆସିଲେ ଆତଙ୍କବାଦୀ ? ଏ ସୂଚନାକୁ କାହିଁକି ଲୁଚାଉଛନ୍ତି ପ୍ରତିରକ୍ଷା ମନ୍ତ୍ରୀ? : ଗୌରବ ଗୋଗୋଇ

ନନ୍ଦିଘୋଷ ବ୍ୟୁରୋ :  ସୋମବାର ଲୋକସଭାରେ ’ଅପରେସନ ସିନ୍ଦୂର’କୁ ନେଇ ଆଲୋଚନା ଆରମ୍ଭ ହୋଇଛି। ‘ଅପରେସନ ସିନ୍ଦୂର’ ଉପରେ ଆଲୋଚନାରେ ଭାଷଣ ଦେଇ କଂଗ୍ରେସ ସାଂସଦ ଗୌରବ ଗୋଗୋଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଥିଲେ ଏବଂ ପହଲଗାମ ଆତଙ୍କବାଦୀ ଆକ୍ରମଣ ବିଷୟରେ ସୂଚନା ଲୁଚାଇବା ନେଇ ଅଭିଯୋଗ କରିଥିଲେ। ସେ କହିଥିଲେ, “ରାଜନାଥ ସିଂହ ବହୁତ ସୂଚନା ଦେଇଥିଲେ, କିନ୍ତୁ ପ୍ରତିରକ୍ଷା ମନ୍ତ୍ରୀ ଭାବରେ, ସେ କେବେ କହି ନଥିଲେ ଯେ ପାକିସ୍ତାନରୁ ଆତଙ୍କବାଦୀମାନେ ପହଲଗାଓଁକୁ କିପରି ଆସି ୨୬ ଜଣଙ୍କୁ ହତ୍ୟା କଲେ ? ଜାତୀୟ ସ୍ୱାର୍ଥ ପାଇଁ ଏହି ପ୍ରଶ୍ନ ପଚାରିବା ଆମର କର୍ତ୍ତବ୍ୟ।”

ସରକାର ଦାୟିତ୍ୱ ନେବା ଉଚିତ 

ଲୋକସଭାରେ କଂଗ୍ରେସର ଉପନେତା ଗୋଗୋଇ କହିଛନ୍ତି ଯେ, “ଆମେ ଦେଶରେ ହିନ୍ଦୁ-ମୁସଲିମ ରାଜନୀତି ହେଉ ବୋଲି ଚାହୁଁନାହୁଁ। ରାହୁଲ ଗାନ୍ଧୀ ସ୍ପଷ୍ଟ ଭାବରେ କହିଛନ୍ତି ଯେ ଆମେ ସରକାରଙ୍କ ସହିତ ଅଛୁ ଏବଂ ସରକାରଙ୍କୁ ପାକିସ୍ତାନକୁ କଡ଼ା ଜବାବ ଦେବାକୁ ପଡିବ। ଲୋକମାନେ ଏହା ମଧ୍ୟ ଜାଣିବାକୁ ଚାହାଁନ୍ତି ଯେ ୧୦୦ ଦିନ ବିତିଗଲାଣି ଏବଂ ସରକାର ସେହି ପାଞ୍ଚ ଜଣ ଆତଙ୍କବାଦୀଙ୍କୁ ଧରିପାରିଲେ ନାହିଁ। କିଏ ଏହି ଆତଙ୍କବାଦୀଙ୍କୁ ସୂଚନା ଦେଇଥିଲେ ଏବଂ କେଉଁ ଲୋକମାନେ ସେମାନଙ୍କୁ ସାହାଯ୍ୟ କରିଥିଲେ  ? ଏନେଇ ଆଜି ମଧ୍ୟ ସରକାର ଏହାର କୌଣସି ଜବାବ ଦେଇନାହାଁନ୍ତି।

ବିରୋଧୀ ଦଳ ଏହି ପ୍ରଶ୍ନଗୁଡ଼ିକ ପଚାରିବା ପାଇଁ ଅପରେସନ ସିନ୍ଦୁର ଉପରେ ଏକ ବିଶେଷ ବିତର୍କ ଦାବି ସେ କରିଛନ୍ତି। ଗୋଗୋଇ କହିଛନ୍ତି ଯେ ସରକାର ଦାୟିତ୍ୱ ନେବା ଉଚିତ ଏବଂ ଜମ୍ମୁ ଏବଂ କାଶ୍ମୀରର ଲେଫ୍ଟନାଣ୍ଟ ଗଭର୍ଣ୍ଣର ମନୋଜ ସିହ୍ନାଙ୍କ ପଛରେ ଲୁଚିବା ଉଚିତ ନୁହେଁ, ଯିଏ ସମ୍ପ୍ରତି ସୁରକ୍ଷା ବିଫଳତା ବୋଲି କହିଥିବା ନୈତିକ ଦାୟିତ୍ୱ ନେଇଛନ୍ତି।

ଗୋଗୋଇ ତାଙ୍କ ଭାଷଣରେ କହିଥିଲେ ଯେ ପହଲଗାଓଁ ଆକ୍ରମଣ ଏବଂ ଅପରେସନ ସିନ୍ଦୂର ପରେ, “କିଛି ଲୋକ ଭୁଲ ସୂଚନା ପ୍ରସାର କରିବା ପାଇଁ କାମ କରୁଥିଲେ।” ସେ ଏହା ମଧ୍ୟ କହିଛନ୍ତି ଯେ ପହଲଗାମ ଆକ୍ରମଣ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାଉଦି ଆରବ ଗସ୍ତ ସମାପ୍ତ କରିବା ପରେ, ପ୍ରଭାବିତ ଅଞ୍ଚଳକୁ ତୁରନ୍ତ ପରିଦର୍ଶନ କରିବା ପରିବର୍ତ୍ତେ ବିହାରରେ ରାଜନୈତିକ ଭାଷଣ ଦେଇଥିଲେ। ସେ ଆହୁରି କହିଥିଲେ, “କେବଳ ରାହୁଲ ଗାନ୍ଧୀ ପ୍ରଭାବିତ ଲୋକଙ୍କୁ ଭେଟିବା ପାଇଁ ସେଠାକୁ ଯାଇଥିଲେ,” ଯେତେବେଳେ ଶାସକ ମେଣ୍ଟର ସଦସ୍ୟମାନେ ତାଙ୍କୁ ଚୁପ୍ କରିବାକୁ ଚେଷ୍ଟା କରୁଥିଲେ।