ଇସଲାମାବାଦ: ପାକିସ୍ତାନରେ ଚାଲିଥିବା ରାଜନୈତିକ ହଟଚମଟ ଭିତରେ ମୁହଁ ଖୋଲିଲେ ସେନାମୁଖ୍ୟ। ଏକ ବିବୃତିରେ ଜେନେରାଲ ସୟିଦ ଅସିମ ମୁସିର କହିଛନ୍ତି ଅରାଜକତା ଓ ଧ୍ରୁବୀକରଣଭିତ୍ତିକ ରାଜନୀତିରୁ ପାକିସ୍ତାନ ମୁକୁଳିବାର ଆବଶ୍ଯକତା ରହିଛି। ଦେଶରେ ସାଧାରଣ ନିର୍ବାଚନ ସରିଥିଲେ ବି କୌଣସି ଦଳ ସ୍ପଷ୍ଟ ବହୁମତ ପାଇନାହାନ୍ତି। ସେପଟେ ସରକାର ଗଠନ ପ୍ରକ୍ରିୟା ନେଇ ଅନିଶ୍ଚୟତା ଜାରି ରହିଛି। ୧୯୪୭ରେ ଦେଶ ସ୍ବାଧୀନତା ଲାଭ ପରଠାରୁ ଅଧିକାଂଶ ସମୟ ପାକିସ୍ତାନ ରାଜନୀତିରେ ସାମରିକ ପ୍ରଭାବ ରହିଆସିଛି। ଜେନେରାଲ ମୁସିରଙ୍କ ଏହି ବୟାନ ଭିନ୍ନ କିଛି ଇଙ୍ଗିତ କରୁଛି। ସେ ଆହୁରି କହିଛନ୍ତି- ନିର୍ବାଚନ କେବଳ ହାର ଜିତର ଏକ ପ୍ରକ୍ରିୟା ନୁହେଁ। ଜନମତକୁ ନିର୍ଦ୍ଧାରଣ କରିବା ଲାଗି ଏହା ଏକ ପ୍ରକ୍ରିୟା। ଆତ୍ମସ୍ବାର୍ଥଠାରୁ ଦୂରେଇ ରହିବାକୁ ସେ ଦେଇଛନ୍ତି ପରାମର୍ଶ ।
