ବିଜୁଳିବତୀ, ଘରକୁ କରେ ଉଜ୍ଜ୍ବଳ ଅତି । ହେଲେ ଏଠି ସଞ୍ଜ ନଇଁଲେ ଗାଁ ଦାଣ୍ଡ ଶୂନଶାନ । ଡରାଉଛି କିଟିମିଟି ଅନ୍ଧାର । କ୍ୟାଣ୍ଡେଲ ଜଳାଇ ପାଠ ପଢୁଛନ୍ତି ପିଲା । କନ୍ଧମାଳ ଜିଲ୍ଲା ଦାରିଙ୍ଗବାଡି ବ୍ଲକ ସରାମୂଳି ପଞ୍ଚାୟତ ଗାନ୍ଦୁରି ଗାଁକୁ ଆଜି ଯାଏଁ ପହଞ୍ଚିନି ବିଦ୍ୟୁତ । ଗାଁରେ ଦୀର୍ଘ ବର୍ଷ ଧରି ୨୦ ରୁ ଉର୍ଦ୍ଧ୍ଵ ପରିବାର ବସବାସ କରିଆସୁଛନ୍ତି । ହେଲେ ଦୁଃଖର କଥା ସେମାନଙ୍କ ପାଖେ ସରକାରୀ ଯୋଜନା ପହଞ୍ଚିପାରିନାହିଁ । ବିଦ୍ୟୁତ ନଥିବାରୁ କ୍ୟାଣ୍ଡେଲ ଜାଳି ରାତି ବିତାଉଛନ୍ତି ଲୋକେ । ଖାଲି ବିଦ୍ୟୁତ କାହିଁକି ପ୍ରଧାନମନ୍ତ୍ରୀ ଆବାସ ଯୋଜନାରେ ଲୋକଙ୍କୁ ଘର ଖଣ୍ଡେ ବି ମିଳିନି । ଫଳରେ ଖରା ବର୍ଷାକୁ ଖାତିର ନକରି ଝାଟିମାଟି ଘରେ ଦୟନୀୟ ଭାବେ ଜୀବନ ବିତାଉଛନ୍ତି ଲୋକେ ।
ଅନ୍ୟପଟେ ଗାଁରେ ଅଙ୍ଗନବାଡି କେନ୍ଦ୍ରଟିଏ ନାହିଁ । ଅଙ୍ଗନବାଡି କେନ୍ଦ୍ର ନଥିବାରୁ ୪ କିଲୋମିଟର ଦୂରକୁ ପିଲାଙ୍କୁ ଯିବାକୁ ପଡୁଛି । ଅନେକ ପିଲା ପ୍ରାକ ଶିକ୍ଷାରୁ ବଞ୍ଚିତ ହେବା ସହ ସେମାନଙ୍କୁ ଅଣ୍ଡା ଛତୁଆ ମିଳୁନଥିବା ଅଭିଯୋଗ ହୋଇଛି । ସମସ୍ୟା ସଂପର୍କରେ ଗ୍ରାମବାସୀ ବ୍ଲକ ପ୍ରଶାସନ ଠାରୁ ଆରମ୍ଭ କରି ଜିଲ୍ଲା ପ୍ରଶାସନଙ୍କୁ ଜଣାଇ ସାରିଲେଣି । ହେଲେ ଫଳ ଶୂନ । ଗାନ୍ଦୁରି ଗ୍ରାମବାସୀଙ୍କ ସମସ୍ୟାର ସମାଧାନ କେବେ ? ସରକାର ସେମାନଙ୍କୁ କେବେ ମୌଳିକ ସୁବିଧା ସୁଯୋଗ ଯୋଗାଇ ଦେବେ ? ତାକୁ ହିଁ ଅପେକ୍ଷା ।
