ଡାକ୍ତରଙ୍କ ସେବା ପ୍ରେରଣାଦାୟୀ ବୋଲି କହିଲେ ମୋଦି, ବଢାଇଲେ ସ୍ୱାସ୍ଥ୍ୟ ବଜେଟ୍

ନୂଆଦିଲ୍ଲୀ: ଜାତୀୟ ଡାକ୍ତର ଦିବସ ଅବସରରେ ଦେଶର ସ୍ୱାସ୍ଥ୍ୟ କର୍ମୀମାନଙ୍କୁ ସମ୍ବୋଧିତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏହି ଅବସରରେ ସେ କହିଛନ୍ତି ଯେ ଗତ ଦେଢ ବର୍ଷ ମଧ୍ୟରେ ଡାକ୍ତରମାନେ ଦିନରାତି କାର୍ଯ୍ୟ କରି ଏକ ଉଦାହରଣ ସୃଷ୍ଟି କରିଛନ୍ତି।

ଏପରିକି କରୋନା କାଳରେ ଡାକ୍ତରମାନେ ‘ଦେବଦୂତ’ ସାଜି ଲୋକଙ୍କ ଜୀବନ ରକ୍ଷା କରିଛନ୍ତି। ଭଗବାନଙ୍କର ଦ୍ୱିତୀୟ ରୂପ କୁହାଯାଉଥିବା ଡାକ୍ତରମାନେ ଏହି ମହାମାରୀ ସମୟରେ ଲକ୍ଷ ଲକ୍ଷ ଲୋକଙ୍କ ଜୀବନ ରକ୍ଷା କରିଛନ୍ତି।

Our doctors, their knowledge and experience is helping us battle this COVID19 virus. Budget allocation for the health sector has been doubled: PM Modi's address on #DoctorsDay2021 pic.twitter.com/9AiYvdkcbT

— ANI (@ANI) July 1, 2021

ସେ ଆହୁରି ମଧ୍ୟ କହିଛନ୍ତି ଯେ ଦେଶର ସ୍ୱାସ୍ଥ୍ୟ ସୁବିଧା ପୂର୍ବ ଅପେକ୍ଷା ସୁଦୃଢ ହୋଇଛି। ଦେଶର ଚିକିତ୍ସା ଭିତ୍ତିଭୂମି ଅଧିକ ନିର୍ମାଣ କରାଯାଉଛି। କରୋନା କାଳରେ ପ୍ରାଣ ହରାଇଥିବା ଡାକ୍ତରମାନଙ୍କୁ ସେ ପ୍ରଣାମ ମଧ୍ୟ ଜଣାଇଛନ୍ତି ।

ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଚଳିତ ବର୍ଷ ସ୍ୱାସ୍ଥ୍ୟ କ୍ଷେତ୍ର ପାଇଁ ବଜେଟ୍ ଆବଣ୍ଟନ ଦ୍ୱିଗୁଣିତ ହୋଇଛି ଅର୍ଥାତ୍ ଦୁଇ ଲକ୍ଷ କୋଟି ଟଙ୍କାରୁ ଅଧିକ। ବର୍ତ୍ତମାନ ଆମେ ସ୍ୱାସ୍ଥ୍ୟ ଭିତ୍ତିଭୂମିକୁ ମଜବୁତ କରିବା ପାଇଁ ୫୦ ହଜାର କୋଟି ଟଙ୍କାର କ୍ରେଡିଟ୍ ଗ୍ୟାରେଣ୍ଟି ଯୋଜନା ପ୍ରସ୍ତୁତ କରିଛୁ। ଯେଉଁଠାରେ କି ସ୍ୱାସ୍ଥ୍ୟ ସୁବିଧାର ଅଭାବ ରହିଛି।