ଆମେରିକା ସହ ତିକ୍ତତା ଭିତରେ ଭାରତ ଆସିବେ ପୁଟିନ୍‌ ! ଚିନ୍ତାରେ ଟ୍ରମ୍ପ ..

ନନ୍ଦିଘୋଷ ବ୍ୟୁରୋ: ଟ୍ରମ୍ପଙ୍କ ଟାରିଫ୍ ୱାର ମଧ୍ୟରେ ମୋଦି ଓ ପୁଟିନଙ୍କ ଆଲୋଚନା। ଫୋନରେ ଦୁଇ ନେତା ବିଭିନ୍ନ ପ୍ରସଙ୍ଗରେ କଥା ହୋଇଛନ୍ତି। ଦ୍ଵିପାକ୍ଷିକ ସଂପର୍କ ସହିତ ବିଶ୍ଵର ଅନେକ ପ୍ରସଙ୍ଗ ସେମାନଙ୍କର ଆଲୋଚନାରେ ସ୍ଥାନ ପାଇଥିଲା। ଏପରିକି ୟୁକ୍ରେନ ଯୁଦ୍ଧ ନେଇ ମଧ୍ୟ ଦୁଇ ନେତା ଆଲୋଚନା କରିଛନ୍ତି। ଦୁଇ ଦେଶ ହେଉଛନ୍ତି ପାରମ୍ପରିକ ବନ୍ଧୁ। ଉଭୟଙ୍କ ସଂପର୍କ ବହୁତ ପୁରୁଣା। ତେଣୁ ଷ୍ଟ୍ରାଟେଜିକ୍ ପାର୍ଟନରସିପକୁ ଆହୁରି ଦୃଢ଼ କରିବାକୁ ଦୁଇ ନେତା ସହମତି ହୋଇଥିବା ମୋଦି ତାଙ୍କ ଟ୍ଵିଟର ହ୍ୟାଣ୍ଡଲରେ ପୋଷ୍ଟ କରିଛନ୍ତି। ଭାରତ ଗସ୍ତରେ ଆସିବାରୁ ପୁଟିନକୁ ନିମନ୍ତ୍ରଣ କରିଛନ୍ତି ମୋଦି। ଯାହା ଜଣାପଡୁଛି ଏହି ବର୍ଷ ଶେଷ ଆଡ଼କୁ ପୁଟିନ ଭାରତ ଆସିପାରନ୍ତି। ୟୁକ୍ରେନ ବିବାଦର ଶାନ୍ତିପୂର୍ଣ୍ଣ ସମାଧାନ ପାଇଁ ଆହ୍ଵାନ ଦେଇଛନ୍ତି ମୋଦି। ଏହା ଆଗରୁ କ୍ରେମଲିନରେ ଜାତୀୟ ସୁରକ୍ଷା ପରାମର୍ଶଦାଦା ଅଜିତ ଡୋଭାଲ ରୁଷ ରାଷ୍ଟ୍ରପତିଙ୍କୁ ସାକ୍ଷାତ କରିଥିଲେ। ରଷରୁ ତେଲ ଆମଦାନୀ କରୁଥିବାରୁ ଆମେରିକାର ରାଷ୍ଟ୍ରପତି ଟ୍ରମ୍ପ ଭାରତ ଉପରେ ୫୦ ପ୍ରତିଶତ ଟାରିଫ ଲଗାଇଛନ୍ତି। ଏହି ପରିସ୍ଥିତିରେ ମୋଦି ଓ ପୁଟିନଙ୍କ ମଧ୍ୟରେ ହୋଇଥିବା ଆଲୋଚନାର ବେଶ ଗୁରୁତ୍ଵ ରହିଛି।

ମୋଦିଙ୍କ ଟୁଇଟ୍

ପ୍ରଧାନମନ୍ତ୍ରୀ ମୋଦି ଏହି ଆଲୋଚନା ସମ୍ପର୍କରେ ସୋସିଆଲ ମିଡିଆ ପ୍ଲାଟଫର୍ମ ‘X’ ରେ ଏକ ପୋଷ୍ଟ ମଧ୍ୟ ପୋଷ୍ଟ କରିଛନ୍ତି। ଏଥିରେ ସେ କହିଛନ୍ତି, ମୋର ବନ୍ଧୁ ରାଷ୍ଟ୍ରପତି ପୁଟିନଙ୍କ ସହ ମୋର ଦୀର୍ଘସମୟ ପର୍ଯ୍ୟନ୍ତ ଆଲୋଚନା ହୋଇଥିଲା। ୟୁକ୍ରେନକୁ ନେଇ ତାଙ୍କ ନିଷ୍ପତ୍ତି ପାଇଁ ମୁଁ ତାଙ୍କୁ ଧନ୍ୟବାଦ ଜଣାଉଛି। ଆମେ ଆମର ଦ୍ୱିପାକ୍ଷିକ ସମ୍ପର୍କ ନେଇ ମଧ୍ୟ ସମୀକ୍ଷା କରିଛୁ ଏବଂ ଭାରତ-ରୁଷ ସ୍ୱତନ୍ତ୍ର ଏବଂ ସୁବିଧାପ୍ରାପ୍ତ ରଣନୈତିକ ସହଭାଗୀତାକୁ ଆହୁରି ଗଭୀର କରିବା ପାଇଁ ଆମର ପ୍ରତିବଦ୍ଧତାକୁ ଦୋହରାଇଛୁ। ମୁଁ ଚଳିତ ବର୍ଷ ଶେଷରେ ଭାରତରେ ରାଷ୍ଟ୍ରପତି ପୁଟିନଙ୍କୁ ଆତିଥ୍ୟ ଦେବା ପାଇଁ ଅପେକ୍ଷା କରିଛି।

https://x.com/narendramodi/status/1953804374158840158?

ଅଜିତ ଡୋଭାଲ ଏବଂ ପୁଟିନଙ୍କ ସାକ୍ଷାତ

ପୁଟିନ ଏବଂ ପ୍ରଧାନମନ୍ତ୍ରୀ ମୋଦିଙ୍କ ମଧ୍ୟରେ ଏହି ଆଲୋଚନା ପୂର୍ବରୁ, NSA ଅଜିତ ଡୋଭାଲ ଗୁରୁବାର କ୍ରେମଲିନରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିଥିଲେ। ଏହି ସମୟରେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସହଯୋଗ ଉପରେ ଆଲୋଚନା ହୋଇଥିଲା। ଡୋଭାଲ ସମସ୍ତ କ୍ଷେତ୍ରରେ ସହଯୋଗ ଜାରି ରଖିବା ପାଇଁ ତାଙ୍କର ପ୍ରତିବଦ୍ଧତାକୁ ଦୋହରାଇଥିଲେ। କ୍ରେମଲିନରେ ଅନୁଷ୍ଠିତ ବୈଠକରେ ଡୋଭାଲଙ୍କ ସହିତ ଭାରତୀୟ ରାଷ୍ଟ୍ରଦୂତ ବିନୟ କୁମାର ମଧ୍ୟ ଉପସ୍ଥିତ ଥିଲେ। ଏହା ସହିତ, ରୁଷ ସୁରକ୍ଷା ପରିଷଦର ସଚିବ ସେରଗେ ମଧ୍ୟ ଯୋଗ ଦେଇଥିଲେ।

ବ୍ରାଜିଲ ରାଷ୍ଟ୍ରପତିଙ୍କ ସହ ପ୍ରଧାନମନ୍ତ୍ରୀଙ୍କ କଥାବାର୍ତ୍ତା

ପ୍ରଧାନମନ୍ତ୍ରୀ ମୋଦି ଗୁରୁବାର ବ୍ରାଜିଲର ରାଷ୍ଟ୍ରପତିଙ୍କ ସହ କଥା ହୋଇଥିଲେ। ରାଷ୍ଟ୍ରପତି ଲୁଲା ତାଙ୍କୁ ଫୋନ୍ କରିଥିଲେ। ଏହି କଥାବାର୍ତ୍ତା ପରେ, ପ୍ରଧାନମନ୍ତ୍ରୀ ମୋଦି ଏକ ପୋଷ୍ଟରେ ଲେଖିଛନ୍ତି, “ରାଷ୍ଟ୍ରପତି ଲୁଲାଙ୍କ ସହ ଭଲ ଆଲୋଚନା ହେଲା। ମୋର ବ୍ରାଜିଲ ଗସ୍ତକୁ ସ୍ମରଣୀୟ କରିବା ପାଇଁ ଧନ୍ୟବାଦ। ଆମେ ବାଣିଜ୍ୟ, ଶକ୍ତି, ପ୍ରଯୁକ୍ତିବିଦ୍ୟା, ପ୍ରତିରକ୍ଷା, ସ୍ୱାସ୍ଥ୍ୟ ଇତ୍ୟାଦି କ୍ଷେତ୍ରରେ ଆମର ରଣନୈତିକ ସହଭାଗୀତାକୁ ଆହୁରି ମଜବୁତ କରିବାକୁ ପ୍ରତିବଦ୍ଧ।