OLXରେ MBA ଠକ, ଫେକ୍ ଗାଡି ସୋ ରୁମ୍ କରି ଲୁଟୁଥିଲା ଆଡଭାନ୍ସ

ଭୁବନେଶ୍ୱର: ଓଏଲଏକ୍ସରେ ସେକେଣ୍ଡ ହ୍ୟାଣ୍ଡ ଗାଡି ଦେବାକୁ କହି କୋଟି କୋଟି ଟଙ୍କା ହଡପ କରୁଥିଲା । କୋଲକାତାରୁ ଗିରଫ ହେବାପରେ ଏବେ ଠକାମୀର ଗୁମର ଖୋଲିଛି ମୋଷ୍ଟ ୱାଣ୍ଟେଡ ଠକ ତୃପି ରଞ୍ଜନ ଦାସ । ଗୋଟିଏ ଗାଡିକୁ ନେଇ ଅନେକ ଲୋକଙ୍କୁ ଅନଲାଇନ ଜରିଆରେ ମୋହରା ସଜାଉଥିଲା ଏହି ହାଇପ୍ରୋଫାଇଲ ଠକ । ସେହିପରି ଫେକ୍ ଗାଡି ସୋ ରୁମ୍ କରି ଲୋକଙ୍କ ଠାରୁ ଆଡଭାନ୍ସ ନେଉଥିବା ଭଳି ମଧ୍ୟ ସାଙ୍ଘାତିକ ଅଭିଯୋଗ ହୋଇଛି ।

ସେପଟେ ଗାଡି ବିକିବାକୁ ଚାହୁଁଥିବା ମାଲିକଙ୍କ ଠାରୁ ଗାଡ଼ି ଆଣିବା ସହ କିଛି ଟଙ୍କା ମଧ୍ୟ ଆଣିଥାଏ ଏହି ଅଭିଯୁକ୍ତ । ଗାଡି କିଣିବାକୁ ଚାହୁଁଥିବା ଲୋକଙ୍କୁ ଫଟୋ ପଠାଇ ବିଶ୍ବାସ ଜନ୍ମେଇବା ପାଇଁ ଆଡଭାନ୍ସ ସହିତ ଏଗ୍ରିମେଣ୍ଟ କରେ ଅଭିଯୁକ୍ତ । ଗାଡିର ଓନରସିପ୍ ପାଇଁ ସମୟ ଲାଗିବ କହି ଲୋକଙ୍କୁ ଧରା ଛୁଆଁ ଦିଏନି । ଲୋକେ ଗାଡି ପାଇବାରେ ବିଳମ୍ବ ହେଲେ ଟଙ୍କା ମାଗିଲେ ଧମକ ଦେବା ଭଳି ଅଭିଯୋଗ ମଧ୍ୟ ରହିଛି ।

ଚତୁରତାର ସହିତ ଠକୁଥିବା ଏହି ଯୁବକ ଜଣଙ୍କ ଭୁବନେଶ୍ବରରେ ଧରାପଡିବା ଭୟରେ ଉପାନ୍ତ ଅଞ୍ଚଳରେ କରୁଥିଲା ଅପରେସନ । ବଡଗଡ ଥାନାରେ ଏତଲା ପରେ ପୋଲିସ ଆରମ୍ଭ କରିଥିଲା ଅପରେସନ ତୃପ୍ତି । ମୋବାଇଲ ଟ୍ରାକ କରି ଠକ ମାଷ୍ଟରକୁ କୋଲକାତାରୁ ଗରିଫ କରିଥିଲା ପୋଲିସ । ସୋରୁମରୁ ୧୦ଟି ଗାଡି ଜବତ କରିବା ସହ ବେଆଇନ ଆର୍ଥିକ କାରବାରକୁ ଖୋଳତାଡ କରିବାକୁ ପ୍ରୟାସ ଆରମ୍ଭ କରିଛି ପୋଲିସ ।