ଭିଡ଼ ପାଇଁ ପ୍ରଶାସନ ସିଲ୍ କଲା ହୋଟେଲ୍
ଭବାନୀପାଟଣା: ବଢ଼ୁଥିବା କୋଭିଡ୍ ସଂକ୍ରମଣ ରୋକିବାକୁ ରାଜ୍ୟ ସରକାର ପଦକ୍ଷେପ ନେଉଛନ୍ତି । ରାଜ୍ୟର ୧୦ ଜିଲ୍ଲାରେ ଲାଗୁ ହୋଇଛି ରାତ୍ରୀକାଳୀନ କର୍ଫ୍ୟୁ । କଳାହାଣ୍ଡି ଜିଲ୍ଲାରେ ମଧ୍ୟ ନାଇଟ୍ କର୍ଫ୍ୟୁ ଲାଗିଛି । କରୋନା କଟକଣାକୁ କଡ଼ାକଡ଼ି ପାଳନ ଲାଗି ଜିଲ୍ଲା ପ୍ରଶାସନ ପକ୍ଷରୁ ନିର୍ଦ୍ଦେଶନାମା ଜାରି ହୋଇଛି ।
ତେବେ କିଛି ସ୍ଥାନରେ ନିୟମର ଉଲ୍ଲଂଘନ ହେଉଛି । ହୋଟେଲରେ ଅତ୍ୟଧିକ ଭିଡ଼ ଯୋଗୁଁ ବାଲାଜୀ ସୁଇଟ୍ସକୁ ସିଲ୍ କରି ଦେଇଛି ଭବାନୀପାଟଣା ପୋଲିସ । ହୋଟେଲ ରେ ଅଧିକ ଭିଡ଼ ଥିବା ଯୋଗୁଁ ଭବାନୀପାଟଣା ଟାଉନ୍ ଥାନା ଅଧିକାରୀ ସତ୍ୟ କୁମାର ନନ୍ଦ ଏବଂ ଭବାନୀପାଟଣା ପୌର ପରିଷଦ ଅଧିକାରୀଙ୍କ ଉପସ୍ଥିତିରେ ବାଲାଜୀ ସୁଇଟ୍ସକୁ ସିଲ୍ କରାଯାଇଛି ।
କୋଭଡ୍ ନିର୍ଦ୍ଦେଶନାମା ଉଲ୍ଲଂଘନ କରିଥିବା ଯୋଗୁଁ ହୋଟେଲକୁ ୧୦ ହଜାର ଟଙ୍କା ଜରିମାନା କରାଯାଇଛି । ଅନିର୍ଦ୍ଦିଷ୍ଟ ସମୟ ଯାଏ ହୋଟେଲ ସିଲ୍ କରାଯାଇଥିବା ଥାନା ଅଧିକାରୀ ସୂଚନା ଦେଇଛନ୍ତି । ବାଲାଜୀ ସୁଇଟ୍ସ ବ୍ୟତୀତ୍ ଅନ୍ୟ ୪ଟି ଦୋକାନ ସିଲ୍ କରି ଫାଇନ୍ ଆଦାୟ କରିଛି ପୋଲିସ ।
