ହତ୍ୟା ଘଟଣାର ସାକ୍ଷୀ ନହେବାରୁ ହତ୍ୟା
ନନ୍ଦିଘୋଷ ବ୍ୟୁରୋ: ହତ୍ୟା ଘଟଣାର ସାକ୍ଷୀ ହେବାକୁ ମନା କରିବାରୁ ଆଉ ଜଣଙ୍କୁ ହତ୍ୟା । ଏମିତି ଘଟଣା ଘଟିଛି ମୟୂରଭଞ୍ଜ ଜିଲ୍ଲା ଉଦଳା ଅଞ୍ଚଳରେ । କାହ୍ନୁ ମଢ଼େଇ ନାମକ ଯୁବକଙ୍କୁ ତିନି ଜଣ ଯୁବକ ପିଟିପିଟି ମାରିଦେବା ଘଟଣାର ପର୍ଦ୍ଦାଫାସ କରିଛି ପୋଲିସ ।
ପୋଲିସ ସୂଚନା ଅନୁସାରେ, ଖୁଣ୍ଟା ଥାନା ଗଡିଗାଁ ଗାଁରେ ଏକ ହତ୍ୟାକାଣ୍ଡ ଘଟିଥିଲା । ଗାଁର କାହ୍ନୁ ମଢେଇଙ୍କୁ ୩ ଜଣ ଯୁବକ ପିଟି ପିଟି ହତ୍ୟା କରିଥିଲେ । ବାରିପଦାରୁ ସାଇଣ୍ଟିଫିକ ଟିମ ଆସି ଯାଞ୍ଚ କରିଥିବା ବେଳେ ସ୍ଥାନୀୟ ପୋଲିସ ତଦନ୍ତ ତ୍ୱରାନ୍ୱିତ କରିଥିଲା । ଏହି ସମୟରେ ନଭେମ୍ବର ମାସରେ ଗ୍ୟାସ ଟାଙ୍କି ଚୋରି ଘଟଣାକୁ ନେଇ ହୋଇଥିବା ଅନ୍ୟ ଏକ ହତ୍ୟା ଘଟଣାର ଲିଙ୍କ ଥିବା ପୋଲିସ ଜାଣିବାକୁ ପାଇଥିଲା ।
ଉକ୍ତ ଗ୍ୟାସ ଟାଙ୍କି ଚୋରି ଘଟଣାରେ ଦୁଇ ଜଣ ଯୁବକ ବାପି କୋହ୍ଲାର ଏବଂ କାହ୍ନୁ ମଢେଇ ସମ୍ପୃକ୍ତ ଥିଲେ । ଦୁହିଁଙ୍କୁ କାବୁ କରି କିଛି ଲୋକେ ନିର୍ଘାତ ମାଡ଼ ମାରିଥିଲେ । ସେହି ମାଡ଼ରେ ବାପି କୋହ୍ଲାର ମୃତ୍ୟୁ ଘଟିଥିଲା । ସେହି ହତ୍ୟାକାଣ୍ଡର ଏକମାତ୍ର ପ୍ରତ୍ୟକ୍ଷଦର୍ଶୀ ଥିଲେ କାହ୍ନୁ । ତେବେ କାହ୍ନୁଙ୍କୁ ସପକ୍ଷରେ ବୟାନ ଦେବାକୁ ୧୧ ଅଭିଯୁକ୍ତ ଚାପ ପାକାଇଥିଲେ । ହେଲେ ସେ ଏଥିପାଇଁ ରାଜି ହୋଇ ନଥିଲେ । ଯାହାକୁ ନେଇ ଦୁଇ ପକ୍ଷ ମଧ୍ୟରେ ଗଣ୍ଡଗୋଳ ହେବା ସହ ଅଭିଯୁକ୍ତମାନେ କାହ୍ନୁଙ୍କୁ ପିଟିପିଟି ହତ୍ୟା କରିଥିବା ପୋଲିସ କହିଛି ।
