ବେଜିଂ: ଚୀନ ରାଷ୍ଟ୍ରପତି ଜିନପିଙ୍ଗ୍ଙ୍କ ପାଇଁ ବଢୁଛି ଅଡୁଆ । ତୃତୀୟ ଥର ଶାସନ ଭାର ସମ୍ଭାଳିବା ପାଇଁ ପ୍ରସ୍ତୁତି ଆରମ୍ଭ କଲେଣି ଜିନ୍ପିଙ୍ଗ । କିନ୍ତୁ ଏହି ପ୍ରସ୍ତୁତି ପୂର୍ବରୁ ଚୀନ ରାଜନୀତିରେ ହଇଚଇ ସୃଷ୍ଟି ହୋଇଛି । ଚୀନ ସେନାର ଶାସନ ଗାଦିରେ ଚୀନ ସେନାର ନଜର ଥିବା ନେଇ ଚାରିଆଡେ ଚର୍ଚ୍ଚା । ହୁଏତ ଏଥିପାଇଁ ଜିନ୍ପିଙ୍ଗ୍ଙ୍କୁ ରାଷ୍ଟ୍ରପତି ଆସନ ବି ହରାଇବାକୁ ପଡିପାରେ । ସେପଟେ ଜିନପିଙ୍ଗ୍ଙ୍କ ବିରୁଦ୍ଧରେ ବିରୋଧ ସ୍ବର ଧୀରେଧୀରେ ତୀବ୍ର ହେବା ଘଟଣା ଅନେକ ପ୍ରଶ୍ନବାଚୀ ସୃଷ୍ଟି କରୁଛି ।
ବେଜିଂର ସିତଙ୍ଗ ପୋଲ ଉପରେ ଦୁଇଟି ବଡ ବ୍ୟାନର ଲଗାଯାଇଥିବା ଦେଖିବାକୁ ମିଳିଛି । ବ୍ୟାନରରେ ‘‘କୋଭିଡ ଟେଷ୍ଟକୁ ନା କୁହ, ଖାଇବାକୁ ହଁ କୁହ, ଲକଡାଉନକୁ ନା, ସ୍ବାଧୀନତାକୁ ହଁ, ମିଛକୁ ନା, ସମ୍ମାନକୁ ହଁ, ସାଂସ୍କୃତିକ କ୍ରାନ୍ତିକୁ ନା, ରିଫର୍ମକୁ ହଁ, ମହାନ ନେତାକୁ ନା, ଭୋଟ ଅଧିକାରକୁ ହଁ, ଗୁଲାମ ନୁହେଁ, ନାଗରିକ ହୁଅ’’ଲେଖାଯାଇଥିବା ଦେଖିବାକୁ ମିଳିଛି । ସେହିପରି ଆଉ ଏକ ପୋଷ୍ଟରରେ ଲେଖାଯାଇଛି ‘‘୦ଆନ୍ଦୋଳନ କର, ତାନଶାହୀ ଜିନପିଙ୍ଗଙ୍କୁ ହଟାଅ’’ । କେବଳ ପୋଷ୍ଟରରେ ପ୍ରତିକ୍ରିୟା ନୁହେଁ ସୋସିଆଲ ମିଡିଆରେ ହ୍ୟାଶଟ୍ୟାଗ୍ ‘ଆଇ ଶ ଇଟ୍’ ଟ୍ରେଣ୍ଡ କରୁଛି । କିନ୍ତୁ ବିରୋଧ ପ୍ରଦର୍ଶନକୁ କିଏ ଉସୁକାଉଛି ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ ।
କିଛିଦିନ ପୂର୍ବରୁ ସମରକନ୍ଦରେ ଏସସିଓ ବୈଠକରୁ ଫେରିବା ପରେ ଜିନ୍ପିଙ୍ଗ୍ କୌଣସି ବି ସାର୍ବଜନିକ ମଞ୍ଚରେ ନଜର ଆସିନଥିଲେ । ଯାହାପରେ ସୋସିଆଲ ମିଡିଆରେ ଗୁଜବର ଧାରା ଆରମ୍ଭ ହୋଇଯାଇଥିଲା । ଚୀନ ସେନା ଶାସନ ଗାଦି ହାତେଇବାକୁ ସବୁ ଷଡଯନ୍ତ୍ର ଆରମ୍ଭ କରିଥିବା ସୋସିଆଲ ମିଡିଆରେ ଭାଇରାଲ ହୋଇଥିଲା । କେବଳ ଏତିକି ନୁହେଁ ଅକ୍ଟୋବର ୧୬ରେ ଜିନପିଙ୍ଗ୍ ନିଜର ତୃତୀୟ କାର୍ଯ୍ୟକାଳ ବି ଆରମ୍ଭ କରିପାରିବେନି ବୋଲି ଚର୍ଚ୍ଚା ହୋଇଥିଲା । ଏଣୁ ଚୀନରୁ ଜିନପିଙ୍ଗ ବିଦା ହେବା ଏକପ୍ରକାର ନିଶ୍ଚିତ ହୋଇଥିଲା ।
