ଜାରି ରହିବ ଶ୍ରୀକ୍ଷେତ୍ର ପରିକ୍ରମା ପ୍ରକଳ୍ପ କାର୍ଯ୍ୟ, ହାଇକୋର୍ଟଙ୍କ ନିଷ୍ପତ୍ତିକୁ ସଠିକ ଦର୍ଶାଇଲେ ଆଇନଜୀବୀ
1 min read
ପୁରୀ: ଅଟକିବନି ଶ୍ରୀମନ୍ଦିର ପରିକ୍ରମା ପ୍ରକଳ୍ପ ମାର୍ଗ କାମ । ଏଏସ୍ଆଇର ସତ୍ୟପାଠ ଓ ତଥ୍ୟରେ ତାଳମେଳ ନଥିବା ଦେଖି ହାଇକୋର୍ଟ ନିର୍ମାଣ କାମରେ ରହିତାଦେଶ ଜାରି ନେଇ ସେପରି କୌଣସି ନିର୍ଦ୍ଦେଶ ଦେଇନାହାନ୍ତି । କୋର୍ଟଙ୍କ ଏପରି ନିଷ୍ପତ୍ତି ଆବେଦନକାରୀ ଓ ଚକ୍ରାନ୍ତକାରୀଙ୍କୁ ହତାଶ କରିଥିବା ବେଳେ ଅନ୍ୟପଟେ ହାଇକୋର୍ଟଙ୍କ ନିଷ୍ପତ୍ତି ଜାଣିବା ପରେ ଏହାକୁ ଉଚିତ୍ ବୋଲି କହିଛନ୍ତି ଆଇନଜୀବୀ । ଶ୍ରଦ୍ଧାଳୁଙ୍କ ପାଇଁ କରାଯାଉଥିବା ବିକାଶ କାମରେ ରୋକ୍ ଲାଗି ପାରବନି ବୋଲି ସୁପ୍ରିମକୋର୍ଟ ମୃଣାଳିନୀ ପାଢୀଙ୍କ ମାମଲାକୁ ଦର୍ଶାଇ ଏହା ସଠିକ୍ ବୋଲି କହିଛନ୍ତି ଆଇନଜୀବୀ ।
ହାଇକୋର୍ଟ ଦେଲେନି ରହିତାଦେଶ । ଜାରି ରହିବ ଶ୍ରୀକ୍ଷେତ୍ର ପରିକ୍ରମା ପ୍ରକଳ୍ପ କାର୍ଯ୍ୟ । ଏଏସ୍ଆଇର ରିପୋର୍ଟ ଓ ତଥ୍ୟରେ ନାହିଁ ତାଳମେଳ । ନିର୍ମାଣ କାର୍ଯ୍ୟ ବନ୍ଦ ସଂକ୍ରାନ୍ତ ପିଟିସନ ଖାରଜ । କୁଚକ୍ରୀଙ୍କୁ ପୂରା ଚୂପ୍ କରିଦେଲା ହାଇକୋର୍ଟଙ୍କ ନିର୍ଦ୍ଦେଶ । ଏବେ ଶ୍ରୀକ୍ଷେତ୍ର ସୌନ୍ଦର୍ଯ୍ୟକରଣ କାମ ଆଗେଇ ଚାଲିବ । କାମରେ ବାଧା ରହିବା ନେଇ ଟଳିଛି ଆଶଙ୍କା । ନିର୍ମାଣ କାମ ଆମସାର ଆକ୍ଟ ଅନୁଯାୟୀ ହେଉଥିବା ଆଡଭୋକେଟ ଜେନେରାଲ ଯୁକ୍ତି ବାଢ଼ି ଥିବାବେଳେ ଏଏସ୍ଆଇର ସତ୍ୟପାଠରେ ପ୍ରକଳ୍ପ ନିର୍ମାଣ ନେଇ ଅନୁମତି NMA ଠାରୁ ଅଣାଯାଇଥିବା ଦର୍ଶାଯାଇଛି । ସତ୍ୟପାଠର ପାରା ୧୮ ଓ ୧୯ରେ ସରକାର ଓ ଏଏସ୍ଆଇ ଉଭୟ ଉଭୟଙ୍କ ମଧ୍ୟରେ ସମନ୍ୱୟ ରକ୍ଷା କରି କାର୍ଯ୍ୟ କରିବାକୁ ଦର୍ଶାଇଛନ୍ତି ।
ଯାହାକୁ ହାଇକୋର୍ଟରେ କାର୍ଯ୍ୟରତ ଆଇନଜୀବୀ ଉଚିତ୍ ବୋଲି ଦର୍ଶାଇଛନ୍ତି । ଶ୍ରଦ୍ଧାଳୁଙ୍କ ସୁବିଧା ପାଇଁ ପରିକ୍ରମା ମାର୍ଗ ପ୍ରକଳ୍ପ କରାଯାଉଛି । ଶ୍ରଦ୍ଧାଳୁଙ୍କ ସୁବିଧା ପାଇଁ ସରକାର କାହିଁକି ଅନୁମତି ନେବେ ? ସରକାର ଯଦି ଭୁଲ୍ କରୁଛନ୍ତି ତେବେ ଏଏସ୍ଆଇ କାହିଁକି ଏତେ ଦିନ ଧରି ଏସବୁ ସୁବିଧା ପ୍ରତି ଆଖି ବୁଜି ଦେଇଥିଲା ବୋଲି ପ୍ରଶ୍ନ କରିଛନ୍ତି ଆଇନଜୀବୀ । ଶ୍ରୀମନ୍ଦିର ଐତିହ୍ୟ କରିଡର ନିର୍ମାଣ ପ୍ରକ୍ରିୟାକୁ ବେଆଇନ୍ । ଏପରି ଅବାନ୍ତର ଯୁକ୍ତିକୁ ପ୍ରମାଣ କରିପାରିନି ଏଏସ୍ଆଇ । ସତ୍ୟପାଠରେ ବିଭିନ୍ନ ଦିଗକୁ ନେଇ ଉପସ୍ଥାପନ କରିଥିବା ଟିପ୍ପଣୀ ଅସ୍ପଷ୍ଟ ଥିବାରୁ ହାଇକୋର୍ଟ ପୁନର୍ବାର ସତ୍ୟପାଠ ଦାଖଲ ପାଇଁ ନିର୍ଦ୍ଦେଶ ଦେଇଛନ୍ତି । ଫଳରେ ଏ ସମ୍ପର୍କିତ ମାମଲାର ପରବର୍ତ୍ତୀ ଶୁଣାଣି ଜୁନ ୨୨ତାରିଖକୁ ଘୁଞ୍ଚିଛି । କୋର୍ଟ ମଧ୍ୟ ଜୁନ୍ ୨୦ ତାରିଖ ମଧ୍ୟରେ ରାଜ୍ୟ ସରକାରଙ୍କ ପକ୍ଷରୁ ସତ୍ୟପାଠ ଦାଖଲ ପାଇଁ ନିର୍ଦେଶ ଦେଇଛନ୍ତି ।
ହେଲେ ନିର୍ମାଣ କାମ ବନ୍ଦ କରିବାକୁ କେଉଁଠି ବି ନିର୍ଦ୍ଦେଶ ଦେଇନାହାନ୍ତି । କୋର୍ଟଙ୍କ ଏପରି ଆଭିମୁଖ୍ୟକୁ ସ୍ୱାଗତ କରିଛନ୍ତି ପୁରୀ ବିଧାୟକ ଓ ସେବାୟତ । କରିଡର ନିର୍ମାଣ ବନ୍ଦ ନେଇ କୁଚକ୍ରୀ କରୁଥିବା ଯୋଜନା ଭଣ୍ଡୁର ହୋଇଥିବା ବେଳେ ଶ୍ରଦ୍ଧାଳୁଙ୍କ ଉଦ୍ଦେଶ୍ୟରେ କରାଯାଉଥିବା ଏହି ପ୍ରକଳ୍ପ କାର୍ଯ୍ୟକୁ ପ୍ରଭୁ ଶ୍ରୀଜଗନ୍ନାଥ ନିଜେ କରୁଥିବା ସେବାୟତ ମତ ରଖିଛନ୍ତି । ତେଣୁ ଉଭୟ ରାଜ୍ୟ ଓ କେନ୍ଦ୍ର ସରକାର ମିଳିତ ଭାବରେ ଯେତେ ଶୀଘ୍ର କାର୍ଯ୍ୟ ଶେଷ କରିବାକୁ ପୁରୀ ବିଧାୟକ ନିବେଦନ କରିଛନ୍ତି । ୨୦୧୯ରେ ସୁପ୍ରିମକୋର୍ଟ ମୃଣାଳିନୀ ପାଢ଼ୀ ମାମଲାରେ କୁହାଯାଇଛି ଯେ, ହାଇକୋର୍ଟ ଲୋକଙ୍କ ହିତରେ କରାଯାଉଥିବା ବିକାଶ କାମକୁ ଅଟକାଇ ପାରିବେନି । ଆଇନଜୀବୀଙ୍କ ମତରେ ଶ୍ରୀମନ୍ଦିରରେ କରା ଯାଉଥିବା ଉନ୍ନତିମୂଳକ କାର୍ଯ୍ୟ ପାଇଁ ମଧ୍ୟ ଏହା ଲାଗୁ ବୋଲି କାହିଁକି ବିରୋଧୀ ବୁଝି ପାରୁନାହାନ୍ତି ?
