ଅଶ୍ୱିନୀଙ୍କୁ ମହଙ୍ଗା ପଡିଲା ମହିଳା ଅମ୍ପାୟାରଙ୍କ ସହ ଝଗଡ଼ା, TNPLରେ ମିଳିଲା ବଡ଼ଦଣ୍ଡ

ନନ୍ଦିଘୋଷ ବ୍ୟୁରୋ :  ଅଶ୍ୱିନୀଙ୍କୁ ମହଙ୍ଗା ପଡିଲା ମହିଳା ଅମ୍ପାୟାରଙ୍କ ସହ ଝଗଡ଼ା  । ଭାରତର ଅଭିଜ୍ଞ ସ୍ପିନର ରବିଚନ୍ଦ୍ରନ ଅଶ୍ୱିନ ନିକଟରେ ତାମିଲନାଡୁ ପ୍ରିମିୟର ଲିଗ୍ (TNPL) 2025ର ଏକ ମ୍ୟାଚ୍ ରେ ନିଜର ରାଗ ଯୋଗୁଁ ଭାରିମୂଲ୍ୟ ଦେବାକୁ ପଡିଛି । ଡିଣ୍ଡିଗୁଲ୍ ଡ୍ରାଗନ୍ସର ଅଧିନାୟକତ୍ୱ କରୁଥିବା ଅଶ୍ୱିନ ଏକ ବିବାଦୀୟ ନିଷ୍ପତ୍ତି ପରେ ପଡ଼ିଆରେ ଅମ୍ପାୟାରଙ୍କ ସହ ଯୁକ୍ତିତର୍କ କରିଥିବାରୁ ଦଣ୍ଡିତ ହୋଇଛନ୍ତି। ଏହି ଘଟଣା ଆଇଡ୍ରିମ୍ ତିରୁପ୍ପୁର ତାମିଜିଆନ୍ସ ବିପକ୍ଷରେ ଖେଳାଯାଇଥିବା ଏକ ମ୍ୟାଚ୍ ସମୟରେ ଘଟିଛି।

କ’ଣ ହୋଇଥିଲା ଘଟଣା ?

ଆଇଡ୍ରିମ୍ ତିରୁପ୍ପୁର ତାମିଜାନ୍ସ ବିପକ୍ଷରେ ପଞ୍ଚମ ଓଭରରେ ଏଲବିଡବ୍ଲୁ ନିଷ୍ପତ୍ତି ଅନୁଯାୟୀ ଅଶ୍ୱିନଙ୍କୁ ଆଉଟ୍ ଘୋଷଣା ପରେ ଏହି ମାମଲା ଆରମ୍ଭ ହୋଇଥିଲା। ବାମହାତୀ ସ୍ପିନର ଆର ସାଇ କିଶୋରଙ୍କ ବଲ୍ ଉପରେ ଏହି ନିଷ୍ପତ୍ତି ଆସିଥିଲା, ଯେତେବେଳେ ଅଶ୍ୱିନ ଏକ ସ୍ୱିପ୍ ସଟ୍ ଖେଳିବାକୁ ଚେଷ୍ଟା କରିଥିଲେ କିନ୍ତୁ ବଲ୍ ତାଙ୍କ ପ୍ୟାଡ୍ ରେ ବାଜିଥିଲା। ଅମ୍ପାୟାର ଏହାକୁ ଆଉଟ୍ ଘୋଷଣା କରିଥିଲେ, ଯଦିଓ ରିପ୍ଲେରେ ସ୍ପଷ୍ଟ ଭାବରେ ଦେଖାଯାଇଥିଲା ଯେ ବଲ୍ ଲେଗ୍ ଷ୍ଟମ୍ପ୍ ବାହାରେ ପିଚ୍ ହୋଇଥିଲା, ଯାହା ଏଲବିଡବ୍ଲୁ ପାଇଁ ବୈଧ ନୁହେଁ। ସେହି ସମୟରେ, ଅଶ୍ୱିନଙ୍କ ଦଳ ପୂର୍ବରୁ ଦୁଇଟି ଡିଆରଏସ୍ ରିଭ୍ୟୁ ହାତଛଡ଼ା କରି ସାରିଥିଲେ, ତେଣୁ ସେ ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରିପାରିବେ ନାହିଁ।

ଅମ୍ପାୟରଙ୍କ ନିଷ୍ପତ୍ତିରେ କ୍ରୋଧିତ ହୋଇ, ଅଶ୍ୱିନ ତୁରନ୍ତ ପଡ଼ିଆରେ ବିରୋଧ କଲେ ଏବଂ ଅମ୍ପାୟରଙ୍କ ସହ ଯୁକ୍ତିତର୍କ କରିବାକୁ ଲାଗିଲେ। ତାଙ୍କର କ୍ରୋଧ ଏତେ ବଢ଼ିଗଲା ଯେ ସେ ବ୍ୟାଟ୍ ସହିତ ତାଙ୍କ ପ୍ୟାଡ୍‌କୁ ମାରିବା ଆରମ୍ଭ କଲେ ଏବଂ ଡଗ୍‌ଆଉଟ୍‌ରେ ପହଞ୍ଚି କ୍ରୋଧରେ ତାଙ୍କର ଗ୍ଲୋଭ୍ସ ଫିଙ୍ଗି ଦେଲେ। ଏହି ଦୃଶ୍ୟ ଷ୍ଟାଡିୟମ୍‌ରେ ଉପସ୍ଥିତ ପ୍ରଶଂସକଙ୍କ ମଧ୍ୟରେ ଏବଂ ସୋସିଆଲ ମିଡିଆରେ ଭାଇରାଲ୍ ହୋଇଗଲା। ଅଶ୍ୱିନଙ୍କ ଏପରି ବ୍ୟବହାର ତାଙ୍କ ଦୀର୍ଘ କ୍ୟାରିୟରରେ ପ୍ରଥମଥର ଦେଖିବାକୁ ମିଳିଥିବା କୁହାଯାଉଛି , କାରଣ ସେ ସାଧାରଣତଃ ଜଣେ ଶାନ୍ତ ଏବଂ ରଣନୀତିକ ଖେଳାଳି ଭାବରେ ଜଣାଶୁଣା।

ଅଶ୍ୱିନଙ୍କୁ ଜୋରିମାନା

ମ୍ୟାଚ୍ ପରେ ଏକ ମିଟିଂରେ ମ୍ୟାଚ୍ ରେଫରି ଅଶ୍ୱିନଙ୍କ ଆଚରଣ ଯାଞ୍ଚ କରିଥିଲେ। ଅମ୍ପାୟାରଙ୍କ ନିଷ୍ପତ୍ତିକୁ ବିରୋଧ କରିବା ପାଇଁ ତାଙ୍କୁ ତାଙ୍କ ମ୍ୟାଚ୍ ପାଇଁ ୧୦ ପ୍ରତିଶତ ଏବଂ କ୍ରିକେଟ୍ ଉପକରଣର ଅପବ୍ୟବହାର ପାଇଁ ୨୦ ପ୍ରତିଶତ ଜରିମାନା କରାଯାଇଥିଲା। ।