ନୂଆଦିଲ୍ଲୀ: ଗଣତନ୍ତ୍ର ଦିବସକୁ ନେଇ ଏବେଠୁ ପ୍ରସ୍ତୁତି ଆରମ୍ଭ ହେବାରେ ଲାଗିଛି। ଜାନୁଆରି ୨୬ରେ ହେବାକୁ ଥିବା ପରେଡରେ ଚଳିତ ଥର ଶକ୍ତି ପ୍ରଦର୍ଶନ କରିବ ରାଫେଲ୍।
ମେଡ୍ ଇନ୍ ଇଣ୍ଡିଆ ଥିମରେ ଭାରତୀୟ ବାୟୁସେନା ଏହି ପରେଡରେ ଲଢୁଆ ବିମାନକୁ ପ୍ରଦର୍ଶନ କରିବ। ପ୍ରଥମ ଥର ପାଇଁ ରାଫେଲକୁ ସାର୍ବଜନୀନ ଭାବେ ପ୍ରଦର୍ଶନ କରାଯିବ।
ପରେଡ ସମୟରେ ମୋଟ୍ ୪୨ଟି ବିମାନ ଫ୍ଲାଇଟ୍ ପାଷ୍ଟର ଅଂଶ ହେବେ। ଯେଉଁଥିରେ ରାଫେଲ୍ ବ୍ୟତୀତ ସୁଖୋଇ-୩୦, ମିଗ୍-୨୯, ଜଗୁଆର୍ ସହ ଅନେକ ଲଢୁଆ ବିମାନ ରହିବ। ସେହିପରି ଚିନୁକ୍ ଟ୍ରାନ୍ସପୋର୍ଟ ହେଲିକାପ୍ଟର, ଆପାଚେ କମ୍ବେଟ୍ ହେଲିକାପ୍ଟର ସି ୧୩୦ ଜେ ଟ୍ରାନ୍ସପୋର୍ଟ ବିମାନ ମଧ୍ୟ ସାମିଲ ରହିବ।
ଏହି ସମୟରେ ତେଜସ୍, ଏଷ୍ଟ୍ରା ମିସାଇଲ୍ ଓ ରୋହିଣୀ ସର୍ବିଲାନ୍ସ ରଡାରକୁ ମଧ୍ୟ ପ୍ରଦର୍ଶିତ କରାଯିବ। ତେବେ ଚିନୁକ ହେଲିକାପ୍ଟର ଆମେରିକାରେ ନିର୍ମିତ ହୋଇଥିବା ବେଳେ ଗତ ୨୦୧୯ ମସିହାରେ ଏହାକୁ ଭାରତୀୟ ବାୟୁ ସେନାରେ ସାମିଲ କରାଯାଇଥିଲା। ଏବେ ଭାରତ ପାଖରେ ୪ଟି ଚିନୁକ୍ ହେଲିକାପ୍ଟର ରହିଛି।
