ମହାରାଷ୍ଟ୍ର ରାଜନୀତିରେ ହଲଚଲ, ୨୦ ବର୍ଷ ପରେ ଏକାଠି ହେଲେ ଠାକରେ ବ୍ରଦର୍ସ ରାଜ ଓ ଉଦ୍ଧବ
ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ର ରାଜନୀତିରେ ଐତିହାସିକ ପରିବର୍ତ୍ତନ ଦେଖିବାକୁ ମିଳିଛି । ଦୀର୍ଘ ୨୦ ବର୍ଷ ପରେ ହାତ ମିଳାଇଛନ୍ତି ରାଜ ଠାକରେ ଓ ଉଦ୍ଧବ ଠାକରେ । ଆସନ୍ତା ଜାନୁଆରୀ ୧୫ରେ ହେବାକୁ ଯାଉଥିବା ପୌର ନିର୍ବାଚନରେ ମିଳିତ ଭାବେ ଲଢିବେ ଶିବସେନା(ୟୁବିଟି) ଓ ମହାରାଷ୍ଟ୍ର ନବ ନିର୍ମାଣ ସମିତି । ମହାରାଷ୍ଟ୍ର ରାଜନୀତି ଲାଗି ଏହା ଏକ ଐତିହାସିକ ମୁହୂର୍ତ୍ତ ବୋଲି କହିଛନ୍ତି ଶିବସେନ ନେତା ସଞ୍ଜୟ ରାୱତ ।
ଉଦ୍ଧବ କହିଛନ୍ତି ତାଙ୍କ ଜେଜେ ପ୍ରବୋଧଙ୍କର ଠାକରେ ସର୍ବଦା ମହାରାଷ୍ଟ୍ରର ସ୍ବାର୍ଥ ଲାଗି ଲଢେଇ କରିଥିଲେ । ଶିବସେନା ଗଠନର ୬୦ ବର୍ଷ ଯାଏଁ ଦଳ ରାଜ୍ୟର ସ୍ବାର୍ଥ ଲାଗି ସଂଗ୍ରାମ କରୁଛି । ମୁମ୍ବାଇକୁ ନଷ୍ଟ କରିବା ଲାଗି କିଛି ବ୍ୟକ୍ତି ଉଦ୍ୟମ କରୁଛନ୍ତି । ଆସନ୍ତା ଜାନୁଆରୀ ୧୫ରେ ମୁମ୍ବାଇ ମହାନଗର ନିମଗ ସମେତ ରାଜ୍ୟର ଅନ୍ୟାନ୍ୟ ପୌର ପରିଷଦର ନିର୍ବାଚନ ହେବାକୁ ଯାଉଛି । ତା’ ପୂର୍ବରୁ ଦୁଇ ଦଳ ମଧ୍ୟରେ ମେଣ୍ଟ ନାନା ଆଶା ସୃଷ୍ଟି କରିଛି । ଦୁଇ ଦଳ ମଧ୍ୟରେ ହୋଇଥିବା ରାଜିନାମା ଅନୁସାରେ ମୁମ୍ବାଇର ମୋଟ ୨୨୭ ଆସନରୁ ଶିବସେନା ୟୁବିଟି ୧୫୦ ଓ ଏମଏନଏସ ୭୭ ଆସନରେ ଲଢିବ । ତେବେ ଏହି ଦୁଇ ଦଳର ମେଣ୍ଟ କଂଗ୍ରେସ ଲାଗି ଅଡୁଆ ପରିସ୍ଥିତି ସୃଷ୍ଟି କରୁଥିବାରୁ ଏହି ମେଣ୍ଟରେ କଂଗ୍ରେସ ସାମିଲ ହୋଇନାହିଁ । ଫଳରେ ଏମଭିଏରେ ଫାଟ ଅଧିକ ବୃଦ୍ଧି ପାଇଛି ।
