କ୍ୱାରେଣ୍ଟାଇନ୍ କେନ୍ଦ୍ରରେ ମହିଳାଙ୍କୁ ଦୁଷ୍କର୍ମ ଅଭିଯୋଗ

ବାଲେଶ୍ୱର: କ୍ୱାରେଣ୍ଟାଇନ୍ କେନ୍ଦ୍ରରେ ମଧ୍ୟ ମହିଳାମାନେ ଅସୁରକ୍ଷିତ । କ୍ୱାରେଣ୍ଟାଇନ୍ କେନ୍ଦ୍ରରେ ମହିଳାଙ୍କୁ ଦୁଷ୍କର୍ମର ଅଭିଯୋଗ ହୋଇଛି । ବାଲେଶ୍ୱର ବାଲିଆପାଳ ଥାନା ବାଲିକୁଟୀ ପଞ୍ଚାୟତର କ୍ୱାରେଣ୍ଟାଇନ୍ ସେଣ୍ଟରରେ ଜଣେ ମହିଳାଙ୍କୁ ସଫେଇ କର୍ମଚାରୀ ଦୁଷ୍କର୍ମ ଉଦ୍ୟମ କରିଥିବା ନେଇ ଅଭିଯୋଗ ହୋଇଛି ।

ସୂଚନା ଅନୁଯାୟୀ: କରୋନା ସଂକ୍ରମଣ ପାଇଁ ସବୁ ଜିଲ୍ଲାରେ କ୍ୱାରେଣ୍ଟାଇନ ସେଣ୍ଟର କରାଯାଇଛି । ବାହାରୁ ଆସୁଥିବା ପ୍ରବାସୀ ମାନେ ଏହି ସେଣ୍ଟରରେ ରହିବେ । ତେବେ ଜଣେ ମହିଳା ତାଙ୍କ ସ୍ୱାମୀ ଓ ଦିଅରଙ୍କ ସହ ହାଇଦ୍ରାବାଦରୁ ଚାରିଦିନ ପୂର୍ବରୁ ଗାଁକୁ ଆସିଥିଲେ । ଏହାପରେ ଗାଇଡଲାଇନ୍ ଅନୁସାରେ ସେମାନେ କ୍ୱାରେଣ୍ଟାଇନ୍ ସେଣ୍ଟରରେ ରହିଥିଲେ ।

ତେବେ ଗତକାଲି ରାତିରେ କ୍ୱାରେଣ୍ଟାଇନ ସେଣ୍ଟରରେ ସଫେଇ କର୍ମଚାରୀ ଭାବରେ କାର୍ଯ୍ୟ କରୁଥିବା ଯୁବକ ମହିଳାଙ୍କୁ ଦୁଷ୍କର୍ମ ଉଦ୍ୟମ କରିଥିବା ଅଭିଯୋଗ ହୋଇଛି । ତେବେ ଏଭଳି ଏହା ପ୍ରଥମ ଥର ପାଇଁ ହୋଇନାହିଁ, ପୂର୍ବରୁ ମଧ୍ୟ ଏଭଳି ଖବର ସାମ୍ନାକୁ ଆସିଛି ।