ବାଲେଶ୍ୱରରେ ପ୍ରତିଷ୍ଠା ହେବ ରିଜର୍ଭ ବ୍ୟାଙ୍କର ଟଙ୍କା ଛାପା କାରଖାନା
ବାଲେଶ୍ୱର: ବାଲେଶ୍ବରରେ ପ୍ରତିଷ୍ଠା ହେବ ରିଜର୍ଭ ବ୍ୟାଙ୍କର ଟଙ୍କା ଛାପା କାରଖାନା । ଏହି ପ୍ରକଳ୍ପ ପ୍ରତିଷ୍ଠା ହେଲେ ବାଲେଶ୍ୱର ଜିଲ୍ଲାରେ ଟଙ୍କା ତିଆରି ହେବା ସହିତ ସ୍ଥାନୀୟ ଲୋକଙ୍କୁ ମିଳିବ ନିଯୁକ୍ତ ସୁଯୋଗ । ପ୍ରକଳ୍ପ ପାଇଁ ଆବଶ୍ୟକ ଶହେ ଏକରରୁ ଅଧିକ ଜମି ଓ ସ୍ଥାନ ନିରୂପଣ ପାଇଁ ରିଜର୍ଭ ବ୍ୟାଙ୍କର ଏକ ପ୍ରତିନିଧି ଦଳ ବାଲେଶ୍ୱର ଜିଲ୍ଲା ଗସ୍ତ କରିଛନ୍ତି ।
ରେମୁଣା ତହସିଲ ଅନ୍ତର୍ଗତ ସେରଗଡ଼, ପଦାବଡ଼ଗାଁ, ନରହରିପୁର ରାଜସ୍ୱ ଗ୍ରାମର ବିଭିନ୍ନ ସ୍ଥାନ ବୁଲି ଦେଖିବା ସହିତ ପ୍ରଶାସନିକ ସ୍ତରରେ ଆଲୋଚନା କରିଛନ୍ତି । ପ୍ରସ୍ତାବିତ ସ୍ଥାନକୁ ଯାତାୟତ ସୁବିଧା, ପାରିପାର୍ଶ୍ୱିକ ପରିବେଶ ପ୍ରଭୃତି ବିଷୟରେ ପ୍ରତିନିଧି ଦଳ ବିସ୍ତୃତ ଆଲୋଚନା କରିଛନ୍ତି । ଏହି ଟିମ୍ ସହିତ ବାଲେଶ୍ୱର ଜିଲ୍ଲାପାଳ, ଅତିରିକ୍ତ ଜିଲ୍ଲାପାଳ, ସ୍ଥାନୀୟ ତହସିଲଦାର ଉପସ୍ଥିତ ଥିଲେ ।
