ମଧ୍ୟରାତ୍ରିରେ ସିକ୍କିମରେ ଭୂସ୍ଖଳନ : ୪ ଜଣଙ୍କର ମୃତ୍ୟୁ

ନନ୍ଦିଘୋଷ ବ୍ୟୁରୋ : ସିକ୍କିମରେ ଭୂସ୍ଖଳନ। ପଶ୍ଚିମ ସିକିମର ୟାଙ୍ଗଥାଙ୍ଗ ନିର୍ବାଚନମଣ୍ଡଳୀ ଅନ୍ତର୍ଗତ ଉପର ରିମ୍ବିରେ ଗତକାଲି ମଧ୍ୟରାତ୍ରିରେ ଭୂସ୍ଖଳନ ଘଟିଛି। ଏଥିରେ ୪ ଜଣଙ୍କର ମୃତ୍ୟୁ ଘଟିଛି । ତିନି ଜଣ ନିଖୋଜ ଥିବା ଜଣାପଡିଛି। ଭୂସ୍ଖଳନ ଘଟିବା ଫଳରେ ଘଟଣାସ୍ଥଳରେ ୩ ଜଣଙ୍କର ମୃତ୍ୟୁ ହୋଇଥିଲା।ସ୍ଥାନୀୟ ଗ୍ରାମବାସୀ ଏବଂ SSB କର୍ମଚାରୀଙ୍କ ସହ ମିଶି ପୋଲିସ ଦଳ ଉଦ୍ଧାରକାର୍ଯ୍ୟ ଆରମ୍ଭ କରିଥିଲା। ବନ୍ୟାଗ୍ରସ୍ତ ହ୍ୟୁମ୍ ନଦୀ ଉପରେ ଏକ ଅସ୍ଥାୟୀ ପୋଲ ନିର୍ମାଣ କରିବା ପରେ ପ୍ରଭାବିତ ଅଞ୍ଚଳରୁ ଦୁଇଜଣ ଆହତ ମହିଳାଙ୍କୁ ବାହାର କରିବାରେ ସଫଳ ହୋଇଥିଲେ। ଉଦ୍ଧାର କରି ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ଜିଲ୍ଲା ହସ୍ପିଟାଲକୁ ତୁରନ୍ତ ସ୍ଥାନାନ୍ତର ସତ୍ତ୍ୱେ ଚିକିତ୍ସାଧୀନ ଅବସ୍ଥାରେ ଜଣେ ମହିଳାଙ୍କ ମୃତ୍ୟୁ ଘଟିଥିଲା। ଅନ୍ୟ ଜଣଙ୍କ ଅବସ୍ଥା ଗୁରୁତର ରହିଛି। ତିନି ଜଣ ଏପର୍ଯ୍ୟନ୍ତ ନିଖୋଜ ଥିବା କହିଛନ୍ତି ସ୍ଥାନୀୟ ଏସପି।