କ୍ରୀଡା ଦିବସରେ ରାଜ୍ୟର ୫ କ୍ରୀଡା ସାମ୍ବାଦିକ ସମ୍ମାନିତ

ଭୁବନେଶ୍ୱର: କ୍ରୀଡା ଦିବସ ଓ ଉତ୍କଳ କରାଟେ ସ୍କୁଲର ପ୍ରତିଷ୍ଠା ଦିବସ ଉପଲକ୍ଷେ ଆଜି ରାଜ୍ୟର ୫ ଜଣ ଶ୍ରେଷ୍ଠ କ୍ରୀଡା ସାମ୍ବାଦିକଙ୍କୁ ସମ୍ମାନିତ କରାଯାଇଛି । ୪ ଜଣ କ୍ରୀଡା ସାମ୍ବାଦିକଙ୍କ ସହ ନନ୍ଦିଘୋଷ ଟିଭିର କ୍ରୀଡା ସାମ୍ବାଦିକ ଦେବୀପ୍ରସନ୍ନ ପାଣିଗ୍ରାହୀଙ୍କୁ ଶ୍ରେଷ୍ଠ କ୍ରୀଡା ସାମ୍ବାଦିକ ଭାବେ ଉପଢୌକନ, ମାନପତ୍ର ଓ ଆର୍ଥିକ ରାଶି ସହ ସମ୍ମାନିତ କରାଯାଇଛି ।

ଉତ୍କଳ କରାଟେ ସ୍କୁଲ ପରିସରରେ ଆଜି ଏହି ପୁରସ୍କୃତ ସମାରୋହ ଅନୁଷ୍ଠିତ ହୋଇଥିଲା । କାର୍ଯ୍ୟକ୍ରମରେ ପଦ୍ମଶ୍ରୀ ଦିଲ୍ଲୀପ ତିର୍କୀ ଓ ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନା ଯୋଗଦେଇ କ୍ରୀଡ଼ା ସାମ୍ବାଦିକଙ୍କୁ ପୁରସ୍କାର ପ୍ରଦାନ କରିଥିଲେ । ଉଲ୍ଲେଖନୀୟ କାର୍ଯ୍ୟ ପାଇଁ ଏହି ସମ୍ମାନ ପ୍ରଦାନ କରାଯାଇଛି  ।