ଆଜିଠାରୁ ଟି-୨୦ ବିଶ୍ବକପ୍ ମହାସମର
ନନ୍ଦିଘୋଷ ବ୍ୟୁରୋ: ଆଜିଠୁ ଆରମ୍ଭ ହେବାକୁ ଯାଉଛି ପୁରୁଷ ଟି-୨୦ ବିଶ୍ବକପ ମହାସମର । ଭାରତ ଓ ଶ୍ରୀଲଙ୍କା ମିଳିତ ଭାବେ ଆୟୋଜନ କରୁଥିବା ଏହି ବିଶ୍ବକପରେ ରେକର୍ଡ ସଂଖ୍ୟାରେ ୨୦ଟି ଦେଶ ଅଂଶଗ୍ରହଣ କରୁଛନ୍ତି । ୪ଟି ଗ୍ରୁପରେ ବିଭକ୍ତ ଏହି ୨୦ ଦଳିଆ ଟୁର୍ଣ୍ଣାମେଣ୍ଟକୁ ନେଇ ଅବଗଣନା ଆରମ୍ଭ ହୋଇଯାଇଛି । ଏଥିରେ ପ୍ରଥମ ଥର ପାଇଁ ଇଟାଲି ଭଳି ଦଳ ଯୋଗ୍ୟତା ଅର୍ଜନ କରିଛି ।
ଉଦଘାଟନୀ ଦିବସରେ ପାକିସ୍ତାନ-ନେଦରଲାଣ୍ଡସ, ୱେଷ୍ଟଇଣ୍ଡିଜ-ସ୍କଟଲ୍ଯାଣ୍ଡ ଖେଳ ହେବାକୁ ଥିବାବେଳେ ଅଫିସିଆଲି ଭାରତ-ଆମେରିକା ମ୍ଯାଚରୁ ବିଶ୍ବକପ ଶୁଭାରମ୍ଭ ହେବ । ବିଶ୍ବକପ ଲାଗି ହିଟ ମ୍ଯାନ ରୋହିତ ଶର୍ମା ଆମ୍ବାସାଡାର ଅଛନ୍ତି । ଆଫଗାନିସ୍ତାନ, ଅଷ୍ଟ୍ରେଲିଆ, ସ୍କଟଲ୍ୟାଣ୍ଡ, ଇଂଲଣ୍ଡ, ଦକ୍ଷିଣ ଆଫ୍ରିକା, ଆମେରିକା, ୱେଷ୍ଟଇଣ୍ଡିଜ, ନ୍ଯୁଜିଲାଣ୍ଡ, ପାକିସ୍ତାନ, ଆୟର୍ଲାଣ୍ଡ, କାନାଡା, ନେଦରଲାଣ୍ଡ, ନାମିବ୍ଯା, ଜିମ୍ବାୱେ, ନେପାଳ, ଓମାନ, ୟୁଏଇ ଓ ଇଟାଲି ପଡିଆକୁ ଓହ୍ଲାଇବେ । ମାର୍ଚ୍ଚ ୮ ତାରିଖ ଯାଏଁ ଟୁର୍ଣ୍ଣାମେଣ୍ଟ ଚାଲିବ ।
ବାଂଲାଦେଶ ସୁରକ୍ଷା କାରଣ ଦର୍ଶାଇ ଭାରତ ଆସିବାକୁ ମନା କରିବାରୁ ତା’ ବଦଳରେ ସ୍କଟଲ୍ଯାଣ୍ଡକୁ ବିଶ୍ବକପ ଟିକେଟ ମିଳିଛି । ପ୍ରଥମ ଥର ଲାଗି ଡିଫେଣ୍ଡିଂ ଚାମ୍ପିଅନ ଭାରତ ଆୟୋଜକ ଭାବେ ଏଥର ଟ୍ରଫି ହାତେଇବାକୁ ପ୍ଲାନ କରିଛି । ଗୃପ ପର୍ଯ୍ୟାୟରେ ପ୍ରତିଦିନ ତିନିଟି ଲେଖାଏଁ ମ୍ୟାଚ ଖେଳାଯିବ । ପ୍ରତ୍ଯେକ ଗୃପର ଶ୍ରେଷ୍ଠ ଦୁଇ ଦଳ ସୁପର-୮କୁ ଯିବେ । ସେଠାରୁ ସେମିଫାଇନାଲିଷ୍ଟ ଓ ଫାଇନାଲିଷ୍ଟ ବଛାଯିବେ । ଗତ ୨୦୨୪ ଟି-ଟ୍ବେଣ୍ଟି ବିଶ୍ବକପ ଫାଇନାଲରେ ଭାରତ ଦକ୍ଷିଣ ଆଫ୍ରିକାକୁ ଏକ ସଂଘର୍ଷପୂର୍ଣ୍ଣ ମ୍ଯାଚରେ ହରାଇ ଚାମ୍ପିଅନ ହୋଇଥିଲା ।
