ଟି-୨୦ ବିଶ୍ବକପ: ଭିଭିଆଇପି ସୁରକ୍ଷା ବ୍ୟବସ୍ଥା ସତ୍ତ୍ବେ ଭାରତରେ ଖେଳିବାକୁ ନାରାଜ ବାଂଲାଦେଶ
ନନ୍ଦିଘୋଷ ବ୍ୟୁରୋ: ସାମରିକ ଓ ଅର୍ଥନୈତିକ କ୍ଷେତ୍ରରେ ଭାରତର କୌଣସି ମୁକାବିଲା କରିବାକୁ ଅଯୋଗ୍ୟ ବାଂଲାଦେଶ ଏବେ ଖେଳ ପଡ଼ିଆରେ ଭାରତ ସହ ଯୁଦ୍ଧ କରିବାକୁ ମନ ବଳାଇଛି । ଟି-୨୦ ବିଶ୍ବକପ ଖେଳିବାକୁ ଭାରତ ଆସିବାକୁ ବାଂଲାଦେଶ ମନା କରିବା ସହ ନିଜ ଜିଦରେ ଅଟଳ ରହିଛି । ଏପରିକି ଟେଷ୍ଟ ଲେଭଲ ଅର୍ଥାତ ଭିଭିଆଇପି ସୁରକ୍ଷା ପ୍ରସ୍ତାବକୁ ମଧ୍ୟ ବାଂଲାଦେଶ କ୍ରିକେଟ ବୋର୍ଡ ଖାରଜ କରିଦେଇଛି । ଆଇସିସି ଦୁଇ କ୍ରିକେଟ ବୋର୍ଡ ମଧ୍ୟରେ ମଧ୍ୟସ୍ଥତା କରି ସ୍ଥିତି ସୁଧାରିବାକୁ ଚେଷ୍ଟା କରୁଛି । ଏମିତି ସ୍ଥିତିରେ ବାଂଲାଦେଶ ମିଡିଆ ରିପୋର୍ଟରେ ଦାବି କରାଯାଇଛି ସୁରକ୍ଷା ଚିନ୍ତା ଦର୍ଶାଇ ଭାରତରେ ଖେଳିବାକୁ ମନା କରୁଥିବା ବାଂଲାଦେଶ ଟେଷ୍ଟ ଲେଭଲ ସିକ୍ୟୁରିଟି ଦିଆଯିବା ପରେ ବି ଯିବାକୁ ମନା କରୁଛି ।
ବିସିସିଆଇ ଅଫର ମାନିବାକୁ ନାରାଜ ବାଂଲାଦେଶ
ବାଂଲାଦେଶ ମିଡିଆ ଅନୁସାରେ, ଆଜି ଅର୍ଥାତ ଜାନୁଆରୀ ୬ ତାରିଖରେ ଆଇସିସି ଏହି ଘଟଣାରେ ବାଂଲାଦେଶ କ୍ରିକେଟ ବୋର୍ଡ ସହ ଅନଲାଇନରେ ଏକ ବୈଠକ କରି ଆଲୋଚନା କରିଛି । ରିପୋର୍ଟ ଅନୁସାରେ ବାଂଲାଦେଶ ବୋର୍ଡର ସୁରକ୍ଷା ଚିନ୍ତାକୁ ଦୂର କରିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ବାଂଲାଦେଶ ଟିମକୁ ଟୁର୍ଣ୍ଣାମେଣ୍ଟ ସମୟରେ ଟେଷ୍ଟ ଲେଭଲ ସୁକ୍ୟୁରିଟି (ଭିଭିଆଇପି) ଦେବାକୁ ପ୍ରସ୍ତାବ ଦେଇଛି । ହେଲେ ବାଂଲାଦେଶ ବୋର୍ଡ ଅନୌପଚାରିକ ଭାବେ ଆଇସିସିକୁ କହିଛି, ଏହି ସୁରକ୍ଷା ଉପଲବ୍ଧ ହେବା ପରେ ବି ସେ ତାଙ୍କ ଟିମ୍ ଭାରତ ପଠାଇବାକୁ ପ୍ରସ୍ତୁତ ନାହିଁ । ମଙ୍ଗଳବାର ହେବାକୁ ଥିବା ବୈଠକରେ ଆଇସିସି, ବିସିସିଆଇର ପ୍ରସ୍ତାବ ପୌପଚାରିକ ଭାବେ ବାଂଲାଦେଶ ବୋର୍ଡ ଆଗରେ ରଖିବ । ଆଉ ଯାହାକୁ ବିସିବି ଅସ୍ବୀକାର କରିବ । ଏମିତିରେ ଆଇସିସି ଓ ବିସିବି କ’ଣ ବିକଳ୍ପ ବାହାର କରୁଛନ୍ତି ତାହା ଦେଖିବାକୁ ବାକି ରହିଛି ।
ଭାରତ-ପାକିସ୍ତାନ ରାସ୍ତାରେ ବାଂଲାଦେଶ
ବାଂଳାଦେଶ ବୋର୍ଡ ଜିଦରୁ ଏହା ସ୍ପଷ୍ଟ ହୋଇ ସାରିଛି ସେ ବି ଭାରତ ଓ ପାକିସ୍ତାନ ରାସ୍ତାରେ ଯିବାକୁ ଚାହୁଁଛି । ଭାରତ ଗତବର୍ଷ ଚାମ୍ପିଅନ୍ସ ଟ୍ରଫି ଖେଳିବାକୁ ପାକିସ୍ତାନ ଯିବାକୁ ମନା କରିଥିଲା । ଫଳରେ ଭାରତର ସମସ୍ତ ମ୍ୟାଚ୍ ୟୁଏଇରେ ଖେଳା ଯାଇଥିଲା । ଏହାପରେ ପାକିସ୍ତାନ ବୋର୍ଡ ନିଜ ଟିମ୍ ଭାରତ ପଠାଇବାକୁ ମନା କରିଥିଲା । ଫଳରେ ମହିଳା ବିଶ୍ବକପରେ ପାକିସ୍ତାନ ଟିମର ମ୍ୟାଚ୍ ଶ୍ରୀଲଙ୍କାରେ ଖେଳାଯାଇଥିଲା । ଆଉ ଚଳିତ ଟି-୨୦ ବିଶ୍ବକପରେ ବି ପାକିସ୍ତାନ ଟିମ୍ ତାର ସମସ୍ତ ମ୍ୟାଚ୍ ଶ୍ରୀଲଙ୍କାରେ ଖେଳିବ । ବାଂଲାଦେଶ ମଧ୍ୟ ପାକିସ୍ତାନ ପରି ଭାରତ ବାହାରେ ମ୍ୟାଚ୍ ଆୟୋଜନ କରିବାକୁ ଦାବି କରିବା ଆରମ୍ଭ କରିଦେଇଛି ।
