ନନ୍ଦିଘୋଷ ବ୍ୟୁରୋ : ପାକିସ୍ତାନ ସରକାର ସ୍ପଷ୍ଟ କରିଛନ୍ତି ଯେ ଏହାର କ୍ରିକେଟ୍ ଦଳ ଟି-୨୦ ବିଶ୍ୱକପ୍ରେ ଅଂଶଗ୍ରହଣ କରିବ, କିନ୍ତୁ ଭାରତ ବିପକ୍ଷରେ ମ୍ୟାଚ୍ ଖେଳିବ ନାହିଁ। ଏହି ମ୍ୟାଚ୍ ଫେବୃଆରୀ ୧୫ ତାରିଖରେ ଶ୍ରୀଲଙ୍କାରେ ଖେଳାଯିବାର କାର୍ଯ୍ୟକ୍ରମ ଥିଲା। ଏହି ନିଷ୍ପତ୍ତି ପରେ, ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ୍ ଏକ ବିବୃତ୍ତି ଜାରି କରିଛନ୍ତି। ଖୱାଜା ଆସିଫ୍ କହିଛନ୍ତି, ‘କ୍ରିକେଟ ହେଉଛି ଜେଣ୍ଟିଲମ୍ୟାନ ମାନଙ୍କ ଗେମ୍’ । ଏହାର ସଂରକ୍ଷଣ କରିବା ପାଇଁ ଏବେ ଏକ ନୂତନ ଅନ୍ତର୍ଜାତୀୟ କ୍ରିକେଟ୍ ସଂଗଠନର ଆବଶ୍ୟକତା ରହିଛି।” ସେ ବର୍ତ୍ତମାନର ସଂଗଠନ, ଅନ୍ତର୍ଜାତୀୟ କ୍ରିକେଟ୍ ପରିଷଦ (ICC) ବିରୁଦ୍ଧରେ ଗମ୍ଭୀର ଅଭିଯୋଗ ଆଣିଛନ୍ତି। ତାଙ୍କ ଅନୁସାରେ, ICC ଆଉ ନିରପେକ୍ଷ ନୁହେଁ ଏବଂ ଦକ୍ଷିଣ ଏସିଆରେ ଭାରତର ରାଜନୈତିକ ସ୍ୱାର୍ଥର ଚାପରେ କାର୍ଯ୍ୟ କରୁଛି।
ପାକିସ୍ତାନ ସରକାର କହିଛନ୍ତି ଯେ ଦଳକୁ ଟୁର୍ଣ୍ଣାମେଣ୍ଟରେ ଖେଳିବା ପାଇଁ ଅନୁମତି ଦିଆଯାଇଛି, କିନ୍ତୁ ରାଜନୈତିକ ଏବଂ ସୁରକ୍ଷା କାରଣରୁ ଭାରତ ବିପକ୍ଷରେ ମ୍ୟାଚ୍ ନ ଖେଳିବାର ନିଷ୍ପତ୍ତି ନିଆଯାଇଛି। ସରକାର ଦାବି କରିଛନ୍ତି ଯେ ଜାତୀୟ ସ୍ୱାର୍ଥକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି। ଏହି ସମୟରେ, ଖୱାଜା ଆସିଫଙ୍କ ବୟାନ ଅନ୍ତର୍ଜାତୀୟ କ୍ରିକେଟ ଜଗତରେ ବିତର୍କ ସୃଷ୍ଟି କରିଛି। ସେ କହିଛନ୍ତି ଯେ କ୍ରିକେଟକୁ ରାଜନୀତିରୁ ଦୂରରେ ରଖିବା ଉଚିତ, କିନ୍ତୁ ICC ଏହା କରିବାରେ ବିଫଳ ହୋଇଛି। ସେ ଏହା ମଧ୍ୟ କହିଛନ୍ତି ଯେ କ୍ରିକେଟର ପ୍ରକୃତ ଉଦ୍ଦେଶ୍ୟ ହେଉଛି କ୍ରୀଡାପ୍ରେମ ଏବଂ ପାରସ୍ପରିକ ସମ୍ମାନ, ଯାହା ଏବେ ଧୀରେ ଧୀରେ କ୍ଷୟ ହେଉଛି।
ପୂର୍ବତନ କିମ୍ବଦନ୍ତୀ ଅଲରାଉଣ୍ଡର ଶାହିଦ ଆଫ୍ରିଦି ମଧ୍ୟ ପାକିସ୍ତାନର ଟି-୨୦ ବିଶ୍ୱକପ୍ରେ ଭାରତ ବିପକ୍ଷରେ ନ ଖେଳିବା ନିଷ୍ପତ୍ତି ଉପରେ ପ୍ରତିକ୍ରିୟା ଦେଇଛନ୍ତି। ଆଫ୍ରିଦି ICC ଉପରେ ଏକ ଗମ୍ଭୀର ପ୍ରଶ୍ନ ଉଠାଛନ୍ତି । ସୋସିଆଲ ମିଡିଆ X ରେ ଏକ ପୋଷ୍ଟରେ ଆଫ୍ରିଦି ଲେଖିଛନ୍ତି, “ମୁଁ ସର୍ବଦା ବିଶ୍ୱାସ କରେ ଯେ ରାଜନୀତି ବନ୍ଦ ହେଲେ କ୍ରିକେଟ ଦୁଇ ଦେଶ ମଧ୍ୟରେ ସମ୍ପର୍କ ସୁଧାରିବାର ମାଧ୍ୟମ ହୋଇପାରିବ । । ଏହା ଦୁଃଖଦ ଯେ ପାକିସ୍ତାନ ଟି-୨୦ ବିଶ୍ୱକପ୍ରେ ଭାରତ ବିପକ୍ଷରେ ମ୍ୟାଚ ଖେଳିବ ନାହିଁ । ମୁଁ ମୋ ସରକାରଙ୍କ ନିଷ୍ପତ୍ତିକୁ ଗ୍ରହଣ କରୁଛି।
