ସ୍ପାଇଡରମ୍ୟାନ ପରେ ଚର୍ଚ୍ଚାରେ ସୁପରମ୍ୟାନ: ୧୦ କେସ୍ ର ଅଭିଯୁକ୍ତ ଦେଉଥିଲା ପ୍ରବଚନ

ସ୍ପାଇଡରମ୍ୟାନ ପରେ ଚର୍ଚ୍ଚାରେ ସୁପରମ୍ୟାନ । ୧୦ କେସ୍ ର ଅଭିଯୁକ୍ତ ଦେଉଥିଲା ପ୍ରବଚନ । ରାଜଧାନୀକୁ ଅଶାନ୍ତ କରି ୟୁଟ୍ୟୁବରେ ଶୁଣାଉଥିଲା ଶାନ୍ତିବାର୍ତ୍ତା । ଆପଣଙ୍କୁ ଲାଗୁଥିବ ଅନର୍ଗଳ ଜ୍ଞାନ ବାଣ୍ଟୁଥିବା ଏହି ବ୍ୟକ୍ତି ଜଣଙ୍କ ବୋଧହୁଏ ଜଣେ ପ୍ରବଚକ । କିନ୍ତୁ ପ୍ରକୃତରେ ଇଏ ଜଣେ ଚୋର । ଚୋରି କରିବା ପରେ ୟୁଟ୍ୟୁବ ଚ୍ୟାନେଲରେ ପ୍ରବଚନ ଶୁଣାନ୍ତି । ୧୦ ଟି କେସରେ ଅଭିଯୁକ୍ତ ଥିବା ଏହି ବ୍ୟକ୍ତିଙ୍କ ନାଁ ହେଉଛି ମନୋଜ କୁମାର ସିଂ । ଘର କଟକ ଜିଲ୍ଲା ବୈଦେଶ୍ୱର ଅନ୍ତର୍ଗତ ଖଜୁରିଆପଦା । ଚେଞ୍ଜ ୟୋର ଲାଇଫ୍ ନାଁ ରେ ଏକ ୟୁଟ୍ୟୁବ ଚ୍ୟାନେଲ ଏହି ବ୍ୟକ୍ତି ଜଣଙ୍କର ରହିଛି । ଗତ ଅଗଷ୍ଟ ୧୪ ତାରିଖରେ ଭରତପୁର ଥାନା ଅନ୍ତର୍ଗତ ଖଣ୍ଡଗିରିବାରୀରୁ ଏକ ଚୋରି ନେଇ ଅଭିଯୋଗ ହୋଇଥିଲା । ଯେଉଁ କେସର ମାଷ୍ଟରମାଇଣ୍ଡ ଥିଲା ଏହି କରିତକର୍ମା। ହ୍ୟୁମାନ ଇଣ୍ଟେଲ୍ଲିଜେନ୍ସ ଓ CCTV ସର୍ଭେଲାନ୍ସ ସାହାଯ୍ୟରେ ଗିରଫକରିଛି ସ୍ପେଶାଲ ସ୍କ୍ବାଡ ।

କିଛିଦିନ ତଳେ ୱାନ ମ୍ୟାନ ଆର୍ମି ସାଜି ନିରଞ୍ଜନ ପଟ୍ଟନାୟକଙ୍କ ଘରୁ କଳାକନା ବୁଲାଇଥିବା ଅଭିଯୁକ୍ତକୁ ଧରିବା ପାଇଁ ଆରମ୍ଭ ହୋଇଥିଲା ଅପରେସନ ସ୍ପାଇଡର । ଧରାପଡିଥିଲା ସାତିର ସ୍ପାଇଡରମ୍ୟାନ । ଆଉ ଏବେ ଏହି ସୁପରମ୍ୟାନ । ଭଲକରି ନଜର ପକାନ୍ତୁ ଏହି ସିସିଟିଭି ଉପରେ । ସ୍କୁଟିରେ ଏକା ଆସୁଥିଲା ଆଉ କଳା କନା ବୁଲାଇ ଚାଲିଯାଉଥିଲା । ଅଭିଯୁକ୍ତ ନିକଟରୁ ୨୦ ଲକ୍ଷ ମୂଲ୍ୟର ୨ ଶହ ଗ୍ରାମ ସୁନା, ୧ ଲକ୍ଷ ଟଙ୍କା, ଏକ ବାଇକ, ଚୋରିରେ ବ୍ୟବହୃତ ଲୁହା ରଡ଼ ଜବତ କରାଯାଇଛି । ଚୋରି ର ଶିକାର ପରିବାରକୁ ଟଙ୍କା ସୁନା ଫେରସ୍ତ କରାଯାଇଛି । ସେପଟେ ଏଯାବତ ଅଭିଯୁକ୍ତ ନାଁ ରେ ନୟାପଲ୍ଲୀ, ଖଣ୍ଡଗିରି, ଚନ୍ଦ୍ରଶେଖରପୁର, ତମାଣ୍ଡୋରେ ୧୦ କେସ ଥିବା ଜାଣିବାକୁ ମିଳିଛି । ଚୋରି ପରେ ଅଭିଯୁକ୍ତ ଦେଉଥିବା ଆଉ କିଛି ପ୍ରବଚନ ଶୁଣନ୍ତୁ । କଥାରେ ଅଛି ଅପରାଧୀ ଯେତିକି ଚାଲାକ ହେଲେ ବି ପୋଲିସ ତାଠାରୁ ଦୁଇ ପାଦ ଆଗରେ । ଯାହାକୁ ଆଜି ପୁଣି ପ୍ରମାଣ କରି ଦେଖାଇଛି ସ୍ପେଶାଲ ସ୍କ୍ବାଡ ।