ମୁମ୍ବାଇ: ବଲିଉଡ ଅଭିନେତା ସୈଫ ଅଲ୍ଲୀ ଖାନଙ୍କୁ ଛୁରାମାଡ଼ ଘଟଣା। ଏବେ ବି କେତେକ ଅସମାହିତ ପ୍ରଶ୍ନର ଉତ୍ତର ମିଳିବା ହୋଇନାହିଁ ସମ୍ଭବ। ତେଣେ ସୈଫଙ୍କ ଘରେ ଥିବା କର୍ମଚାରୀଙ୍କୁ ଜେରା କରିଛି ପୋଲିସ। ଦୁର୍ବୃତ୍ତଜଣକ ସୈଫଙ୍କ ଘରେ ପଶି ସାନପୁଅ ଜାହାଙ୍ଗୀର ଓରଫ ଜୟବାବାର ରୁମରେ ପ୍ରବେଶ କରିଥିଲା। ପରେ ତାକୁ ଠାବ କରିଥିଲେ ମହିଳା ଷ୍ଟାଫ । ସେତେବେଳେ ଦୁର୍ବୃତ୍ତ ଦୁଇ ହାତରେ ମାରଣାସ୍ତ୍ର ଧରିଥିଲା ଏବଂ ଆକ୍ରମଣ କରିବାରୁ ମହିଳାଜଣକ ଆହତ ହୋଇଥିଲେ। ଚିତ୍କାର ଶୁଣି ସୈଫ ଓ କରୀନା ଘର ଭିତରକୁ ଆସିବା ପରେ ଦୁର୍ବୃତ୍ତଜଣକ ଛୁରାମାଡ କରିଥିଲା। ମହିଳା ଷ୍ଟାଫଙ୍କ କହିବା ଅନୁସାରେ ରାତି ୨ଟା ବେଳେ ଜାହାଙ୍ଗୀର ରହୁଥିବା ରୁମର ବାଥରୁମ ଦ୍ବାର ଖୋଲାଥିଲା ଏବଂ ଲାଇଟ ଜଳୁଥିଲା।
ହଠାତ ଜଣେ ବ୍ୟକ୍ତି ବାଥରୁମରୁ ବାହାରି ଜାହାଙ୍ଗୀରର ବେଡ ଆଡକୁ ଯାଇଥିଲା। ପାଟି ନ କରିବା ଲାଗି ବି ସେ ଧମକ ଦେଇଥିଲା। ଏହି ସମୟରେ ଜାହାଙ୍ଗୀରର ନାନୀ ଜୁନୁ ଉଠି ପଡିବା ପରେ ତାଙ୍କୁ ବି ଦୁର୍ବୃତ୍ତ ଧମକ ଦେଇଥିଲା। ପ୍ରତିବାଦ କରିବାରୁ ଷ୍ଟାଫଙ୍କୁ ଦୁର୍ବୃତ୍ତ ଆକ୍ରମଣ କରିବା ସହ ୧ କୋଟି ଟଙ୍କା ଦାବି କରିଥିଲା। ଏହି ସମୟରେ ସୈଫଙ୍କୁ ବି ସେ ଆକ୍ରମଣ କରିଥିଲା। ପରେ ସେ ଚାଲିଯାଇଥିଲା। ଆକ୍ରମଣରେ ଗୀତା ନାମ୍ନୀ ମହିଳା ଷ୍ଟାଫ ଆହତ ହୋଇଥିଲେ। ସୂଚନା ଅନୁସାରେ ଦୁର୍ବୃତ୍ତର ବୟସ ୩୫ରୁ ୪୦ ବର୍ଷ ହେବ ଓ ସେ କଳାରଙ୍ଗର ଥିଲା। ତାର ଉଚ୍ଚତା ଥିଲା ୫ ଫୁଟ ୫ ଇଞ୍ଚ।
