ଭାରତ-ପାକିସ୍ତାନ କ୍ରିକେଟ ପୁଣି ଥରେ ମୁହାଁମୁହିଁ ସ୍ଥିତିରେ ରହିଛନ୍ତି । ପୂର୍ବରୁ ହିଁ ଦୁଇ ଦେଶ ମଧ୍ୟରେ ଦ୍ବିପାକ୍ଷିକ କ୍ରିକେଟ ବନ୍ଦ ହୋଇସାରିଥିବା ବେଳେ କେବଳ ICC-ACCର ଟୁର୍ଣ୍ଣାମେଣ୍ଟରେ ଦୁଇ ଟିମ୍ ଖେଳୁଛନ୍ତି । ମାତ୍ର ଏବେ ମଧ୍ୟ ଉକ୍ତ ସ୍ଥିତି ବଦଳୁଥିବା ଦେଖାଯାଉଛି । ଟି-୨୦ ବିଶ୍ବକପ ୨୦୨୬ରେ ପାକିସ୍ତାନ ସରକାର ଭାରତ ବିପକ୍ଷ ମ୍ୟାଚ ବହିଷ୍କାର ଘୋଷଣା କରି ସ୍ଥିତି ବିଗାଡ଼ି ଦେଇଛନ୍ତି । ତେଣୁ ପାକିସ୍ତାନ କେବଳ ଚଳିତ ବିଶ୍ବକପରେ ଏହି ବୟକଟ କରିବ ନା, ଆଗକୁ ମଧ୍ୟ ପିସିବି ସମାନ ଆଭିମୁଖ୍ୟ ଆପଣାଇବ ବୋଲି ଏବେ ପ୍ରଶ୍ନ ଉଠିଛି । ଆଇସିସି ପୁରୁଷ ଟି-୨୦ ବିଶ୍ବକପରେ ଭାରତ-ପାକିସ୍ତାନକୁ ଗୋଟିଏ ଗ୍ରୁପରେ ରଖାଯାଇଥିବା ବେଳେ ଫେବୃଆରୀ ୧୫କୁ ମ୍ୟାଚ ଖେଳାଯାଇଥାନ୍ତା । ମାତ୍ର ପାକିସ୍ତାନ ଭାରତ ବିପକ୍ଷ ମ୍ୟାଚ ଖେଳିବାକୁ ଅଗ୍ରାହ୍ୟ କରିଦେଇଥିଲା ।
ତେବେ ପାକିସ୍ତାନର ଏହି ପଦକ୍ଷେପ ଦୁଇ ଦେଶର କ୍ରିକେଟ ଭବିଷ୍ୟତ ଉପରେ ପ୍ରଭାବ ପକାଉଛି । ପାକିସ୍ତାନ ଆଗାମୀ ଦିନରେ ଭାରତ ମ୍ୟାଚକୁ ମଧ୍ୟ ବହିଷ୍କାର କରିବ କି ? ଯଦି ପାକିସ୍ତାନ ନିଜର ନିଷ୍ପତ୍ତି ବଦଳାଇବନି ଓ ବର୍ତ୍ତମାନ ସ୍ଥିତି ଜାରି ରୁହେ, ତେବେ ଚଳିତ ବର୍ଷ ଦୁଇ ଦେଶ ମଧ୍ୟରେ ଖେଳାଯିବାକୁ ଥିବା ୩ଟି ରଦ୍ଦ ହୋଇପାରେ । ଅଣ୍ଡର-୧୯ ବିଶ୍ବକପକୁ ଛାଡ଼ିଦେଲେ ଏ ବର୍ଷ ଦୁଇ ଦେଶ ମଧ୍ୟରେ ଅତିକମରେ ୩ଟି ମ୍ୟାଚ ଖେଳାଯିବ । ଟି-୨୦ ବିଶ୍ବକପ ୨୦୨୬ ପରେ ବ୍ୟାଙ୍କଙ୍କରେ ଦୁଇଦେଶର ମହିଳା ଟିମ୍ ମୁହାଁମୁହିଁ ହେବେ । ଏହି ମ୍ୟାଚ ମହିଳା ଏସିଆ କମ୍ ରାଇଜିଂ ଷ୍ଟାର୍ସ ୨୦୨୬ରେ ଖେଳାଯିବ । ତା’ପରେ ଜୁନ ୧୪ରେ ଇଂଲଣ୍ଡ ଓ ଓ୍ବେଲ୍ସରେ ହେବାକୁ ଥିବା ମହିଳା ଟି-୨୦ ବିଶ୍ବକପରେ ମଧ୍ୟ ଦୁଇ ଦେଶ ମୁଁହାଁମୁହିଁ ହେବ । ୧-୨ ଦିନ ଭିତରେ ପାକିସ୍ତାନ ସହ ବିବାଦକୁ ନେଇ ଆଇସିସି ଚୂଡ଼ାନ୍ତ ନିଷ୍ପତ୍ତି ନେଇପାରେ ।
