ଆଜି ୨୦୨୦ର ଶେଷ ସୂର୍ଯ୍ୟ ପରାଗ

ଭୁବନେଶ୍ୱର: ଆଜି ହେଉଛି ଚଳିତ ବର୍ଷର ଶେଷ ସୂର୍ଯ୍ୟ ପରାଗ। ଭାରତୀୟ ସମୟ ଅନୁଯାୟୀ ଏହି ପରାଗ ସନ୍ଧ୍ୟା ୭ ଘଟିକା ୪ ମିନିଟରୁ ଆରମ୍ଭ ହୋଇ ମଧ୍ୟ ରାତ୍ରି ୧୨ ଘଟିକା ୨୩ ମିନିଟ୍ ପର୍ଯ୍ୟନ୍ତ ଚାଲିବ। ସୂଚନା ମୁତାବକ ଏହି ପରାଗ ଭାରତରେ ଦୃଶ୍ୟମାନ ହେବ ନାହିଁ। ଏହା ଦକ୍ଷିଣ ଆଫ୍ରିକା, ଅଧିକାଂଶ ଦକ୍ଷିଣ ଆମେରିକା, ପ୍ରଶାନ୍ତ ମହାସାଗର, ଆଟଲାଣ୍ଟିକ୍ ଓ ଭାରତ ମହାସାଗର ଏବଂ ଆଣ୍ଟାର୍କଟିକାରେ ସମ୍ପୂର୍ଣ୍ଣ ରୂପେ ଦୃଶ୍ୟମାନ ହେବ।

ସୂଚନାଯୋଗ୍ୟ, ୨୦୨୦ରେ ଦୁଇଟି ସୂର୍ଯ୍ୟ ଗ୍ରହଣ ରହିଛି। ସେହିଭଳି, ଆସନ୍ତା ବର୍ଷ ମଧ୍ୟ ଦୁଇଟି ସୂର୍ଯ୍ୟ ଗ୍ରହଣ ହେବ। ତେବେ ପ୍ରଥମ ସୂର୍ଯ୍ୟ ଗ୍ରହଣ ବର୍ଷର ମଧ୍ୟଭାଗରେ ଜୁନ୍ ୧୦ରେ ହେବ ଯାହାକି ଭାରତରେ ଆଂଶିକ ଦୃଶ୍ୟମାନ ହେବ। ସେହିପରି ଦ୍ୱିତୀୟ ସୂର୍ଯ୍ୟପରାଗ ଡିସେମ୍ବର ୪ରେ ହେବ । ଏହି ପରାଗ ଆଣ୍ଟାର୍କଟିକା, ଦକ୍ଷିଣ ଆଫ୍ରିକା, ଆଟଲାଣ୍ଟିକ୍, ଅଷ୍ଟ୍ରେଲିଆ ଏବଂ ଦକ୍ଷିଣ ଆମେରିକା ଉପରେ ପ୍ରଭାବ ପକାଇବ । ଭାରତରେ ଏହା ଦୃଶ୍ୟମାନ ହେବ ନାହିଁ।