ଟାରିଫ ପ୍ରସଙ୍ଗରେ ବଢିଲା ବିବାଦ, ପୁଣି ଧମକ ଦେଲେ ଟ୍ରମ୍ପ

ନନ୍ଦିଘୋଷ ବ୍ୟୁରୋ: ଟାରିଫ ପ୍ରସଙ୍ଗରେ ବଢିଲା ବିବାଦ। ରୁଷଠାରୁ ତୈଳ କ୍ରୟ କରୁଥିବା କାରଣରୁ ଭାରତ ବିରୋଧରେ ଅଧିକ ଟାରିଫ ଲଗାଇବା ପାଇଁ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଚେତାବନୀ ପରେ ଉତକ୍ଷିପ୍ତ ହୋଇଛି ଭାରତ। ଦୋମୁହାଁ ନୀତି ଲାଗି ଉଭୟ ଆମେରିକା ଓ ୟୁରୋପୀୟ ରାଷ୍ଟ୍ରସଂଘ ଉପରେ କ୍ଷୁବ୍ଧ ହୋଇଛି ଭାରତ। ଆମେରିକାର ଏହି ଧମକ ଅଯୌକ୍ତିକ ଓ ନିରର୍ଥକ ବୋଲି କହିଛି ଭାରତ। ଟ୍ରମ୍ପଙ୍କ ବିରୋଧରେ ବିଷୋଦଗାର କରି ବୈଦେଶିକ ବ୍ଯାପାର ମନ୍ତ୍ରାଳୟ କହିଛି- ୟୁକ୍ରେନ ସହ ବିବାଦ ଆରମ୍ଭରୁ ରୁଷଠାରୁ ଡିସକାଉଣ୍ଟ ଦରରେ ତୈଳ କ୍ରୟ କରିଆସୁଛି ଭାରତ। ସେହି ସମୟରେ ରୁଷଠାରୁ ତୈଳ କ୍ରୟ କରିବା ଘଟଣାରେ ବିଶ୍ବ ଶକ୍ତି ବଜାରରେ ଭାରସାମ୍ୟ ଦର୍ଶାଇ ଭାରତକୁ ପ୍ରୋତ୍ସାହନ ଦେଇଥିଲା ଆମେରିକା। ଭାରତୀୟ ଖାଉଟିଙ୍କ ସ୍ବାର୍ଥକୁ ଦୃଷ୍ଟିରେ ରଖି ରୁଷଠାରୁ ଡିସକାଉଣ୍ଟ ଦରରେ ଭାରତ ତୈଳ କ୍ରୟ କରିଆସୁଛି। ୨୦୨୪ରେ ୟୁରୋପୀୟ ରାଷ୍ଟ୍ରସଂଘ ଓ ରୁଷ ମଧ୍ୟରେ ହେଉଥିବା ଦ୍ବିପାକ୍ଷିକ ବାଣିଜ୍ୟ ପରିମାଣ ରୁଷ ସହ ଭାରତ ବାଣିଜ୍ୟ ପରିମାଣଠାରୁ ଅଧିକ ଥିଲା ବୋଲି କହିଛି ଭାରତ।