ରାଜଧାନୀରେ ମାତିଛନ୍ତି ଚୋର, ରାତିରେ ଘରେ ବୁଲାଉଛନ୍ତି କଳାକନା

ବରଗଡ଼: ଚୋର ମାତିଛନ୍ତି ରାଜଧାନୀରେ । ରାତି ଅନ୍ଧାରର ସୁଯୋଗ ନେଇ ନିର୍ଜନ ରାତିରେ ଖାଲି କରି ଦେଉଛନ୍ତି ଘରଦ୍ୱାର, ଲୁଟି ନେଉଛନ୍ତି ସର୍ବସ୍ୱ । ଗୋଟିଏ ରାତିରେ ରାଜଧାନୀରେ ଦୁଇ ଦୁଇଟି ସ୍ଥାନରେ ଲୁଟ୍ ହୋଇଛି । ପୋଲିସର ପାଟ୍ରୋଲିଂକୁ ଚକମା ଦେଇ ଲୁଟି ନେଇଛନ୍ତି ଦୁର୍ବୃତ୍ତ । ପୂଜା ପାଇଁ ରାତ୍ରୀକାଳୀନ କର୍ଫ୍ୟୁ ଲାଗିଛି । ପୋଲିସ ବିଭିନ୍ନ ଛକ ସହରରେ ପଇଁତରା ମାରୁଛି । ହେଲେ ପୋଲିସକୁ ଚକମା ଦେଇ ଲୁଟ୍ କରି ଖସି ଯାଉଛନ୍ତି ଦୁର୍ବୃତ୍ତ ।

ବିଳମ୍ବିତ ରାତିରେ ଭୁବନେଶ୍ୱର ଜଗନ୍ନାଥ ନଗରରେ ଚୋରି ହୋଇଛି । ଜଗନ୍ନାଥ ନଗର ରୋଡ୍ ନମ୍ବର ୮ର ଶିବାଦତ୍ତ ମହାପାତ୍ରଙ୍କ ଘରୁ ଚୋରି ହୋଇଛି । ଦୁର୍ଗା ପୂଜାରେ ପରିବାର ଗାଁକୁ ବୁଲିବାକୁ ଯାଇଥିବା ବେଳେ, ଘରେ କଳାକନା ବୁଲାଇଛନ୍ତି ଦୁର୍ବୃତ୍ତ । ଆଲମାରୀ ଭାଙ୍ଗି ପାଖାପାଖି ୧୦ ଲକ୍ଷ ଟଙ୍କାର ସୁନା ଗହଣା ସହ ୧୦ ହଜାରରୁ ଊର୍ଦ୍ଧ୍ୱ ଟଙ୍କା ଲୁଟି ନେଇଛନ୍ତି । ଚୋରି ସମୟର ଭଡିଓ ସିସିଟିଭିରେ କଏଦ ହୋଇଛି ।

ସେହିଭଳି ଲକ୍ଷ୍ମୀସାଗର ବୈରାଗୀନଗରରୁ ଚୋରି ହୋଇଛି । ୫୦ ହଜାର ଟଙ୍କା ସହ ୪୦ ଗ୍ରାମ୍ ସୁନା ଗହଣା ଲୁଟ୍ ହୋଇଥିବା ଅଭିଯୋଗ ହୋଇଛି । ବଡ଼ ଭାଇ ତଳେ ରହୁଥିବା ବେଳେ, ସାନ ଭାଇ ଉପର ମହଲାରେ ରହୁଥିଲେ । କିଛି ଦିନ ହେବ ସାନ ଭାଇ ଗୁଜରାଟ ଯାଇଛନ୍ତି । ଘରେ କେହି ନଥିବାର ସୁଯୋଗ ନେଇ ଚୋରି କରିଛନ୍ତି ଦୁର୍ବୃତ୍ତ ।