ଆଗ୍ରାରୁ ଫେରିଲେ ଉତ୍ତମ, କହିଲେ କାହିଁକି ପଳାଇଥିଲେ…

ସୋର: ଫେରିଲେ ବାଲେଶ୍ୱର ଜଳେଶ୍ୱର ସରିସା ଗାଁର ଉତ୍ତମ ପଣ୍ଡା । ଗଳା ରୋଗରୁ କାଳେ କ୍ୟାନସର ହୋଇଥାଇ ପାରେ ବୋଲି ଡାକ୍ତର କହିବା ପରେ ମାନସିକ ଭାରସାମ୍ୟ ହରାଇଥିଲେ ଉତ୍ତମ ପଣ୍ଡା । ଏକ କୋହଭରା ଚିଠି ଲେଖି ଗତ ୨୩ ତାରିଖରେ ଘରଛାଡ଼ି ଚାଲି ଯାଇଥିଲେ ଉତ୍ତମ । ପ୍ରଥମେ ବୃନ୍ଦାବନରେ ଠାକୁରଙ୍କ ଦର୍ଶନ ପରେ ଘରକୁ ଫେରିଯିବାକୁ ଭାବିଥିଲେ ।

ପରେ ରେଲୱେ ପୋଲିସ ୟୁପିର ଆଗ୍ରାରୁ ଉଦ୍ଧାର କରି ଶ୍ୱଶୁର ଓ ସମ୍ପର୍କୀୟ ଭାଇଙ୍କ ସହ ଘରକୁ ପଠାଇଥିଲା । ଗତକାଲି ରାତିରେ ବାଲେଶ୍ୱର ଖଇରା ବ୍ଲକ୍ ରାଇକୁଲାରେ ଥିବା ତାଙ୍କ ଶ୍ୱଶୁର ଘରେ ପହଞ୍ଚିବା ପରେ ସ୍ତ୍ରୀ ପିଲାଙ୍କ ସହ ହସ ଖୁସିରେ ଥିବା ଦେଖିବାକୁ ମିଳିଛ । ଗତ ୨୩ ତାରିଖରେ ଉତ୍ତମଙ୍କ ଚିଠି ପଢ଼ି ପରିବାର ଲୋକେ ଜଳେଶ୍ୱର ନାମ୍ପୋ ଫାଣ୍ଡିରେ ନିଖୋଜ ନେଇ ଅଭିଯୋଗ କରିଥିଲେ ।