ଭେଟେରାନ ଫିଲ୍ମ ଅଭିନେତା ବିକ୍ରମ ଗୋଖଲେଙ୍କ ପରଲୋକ
ମୁମ୍ବାଇ: ଭେଟେରାନ ଫିଲ୍ମ ଅଭିନେତା ଓ ଟେଲିଭିଜନ ତାରକା ବିକ୍ରମ ଗୋଖଲେଙ୍କ ପରଲୋକ । ପୁଣେର ଏକ ଘରୋଇ ହସ୍ପିଟାଲରେ ଆରପାରିକୁ ଚାଲିଗଲେ ବିକ୍ରମ । ମୃତ୍ୟୁବେଳକୁ ତାଙ୍କୁ ହୋଇଥିଲା ୮୦ ବର୍ଷ । ବହୁ ହିନ୍ଦୀ ଓ ମରାଠୀ ଫିଲ୍ମରେ ବିକ୍ରମ ଅଭିନୟ କରିଥିଲେ । ଅମିତାଭ ବଚ୍ଚନ ଅଭିନୀତ ଅଗ୍ନିପଥ ଓ ସଞ୍ଜୟ ଲୀଳା ଭନସାଲିଙ୍କ ହିମ ଦିଲ୍ ଦେ ଚୁକେ ସନମରେ ସେ ଅଭିନୟ କରିଥିଲେ ।
ସେ ବିଭିନ୍ନ ଟିଭି ସୋ’ରେ ବି ଅଭିନୟ କରି ଖ୍ୟାତି ଅର୍ଜନ କରିଥିଲେ । ଗତ କିଛିଦିନ ଧରି ଭେଣ୍ଟିଲେଟରରେ ରହି ଦୀନନାଥ ମଙ୍ଗସେଖର ହସ୍ପିଟାଲରେ ଚିକିତ୍ସିତ ହେଉଥିଲେ ବିକ୍ରମ । ବୈକୁଣ୍ଠ କ୍ରିମେଟୋରିୟମରେ ତାଙ୍କର ହେବ ଶେଷକୃତ୍ୟ । ସେ ୨୦୧୦ରେ ମରାଠୀ ଫିଲ୍ମ ଅଣୁମତିରେ ଶ୍ରେଷ୍ଠ ଅଭିନୟ ଲାଗି ପାଇଥିଲେ ଶ୍ରେଷ୍ଠ ଅଭିନେତା ପୁରସ୍କାର ।
ସେ ଘର ଆଜା ପରଦେଶୀ, ଅଲପିବିରାମ, ଜାନା ନା ଦିଲ ସେ ଦୂର, ସଞ୍ଜୀବନୀ, ଇନ୍ଦ୍ରଧନୁଷ ଆଦି ସୋ’ରେ ଅଭିନୟ କରି ଚର୍ଚ୍ଚିତ ହୋଇଥିଲେ । ଫିଲ୍ମ ନିର୍ମାତା ଚନ୍ଦ୍ରକାନ୍ତ ଗୋଖଲେଙ୍କ ଯୋଗ୍ୟ ସନ୍ତାନ ଭାବେ ସେ ଫିଲ୍ମ ଜଗତରେ ପାଦ ଦେଇ ସଫଳ ହୋଇଥିଲେ । ଅଭିମନ୍ୟୁ ଦସାନି ଓ ଶିଳ୍ପା ସେଟ୍ଟୀ ଅଭିନୀତ ନିକମ୍ମାରେ ସେ ଶେଷ ଥର ଅଭିନୟ କରିଥିଲେ ।
