ସିସିଟିଭରେ ଗୁଳିକାଣ୍ଡ ସମୟର ଭିଡିଓ

ନନ୍ଦିଘୋଷ ବ୍ୟୁରୋ: ସୁନ୍ଦରଗଡ଼ ଜିଲ୍ଲା ଚାନ୍ଦିପୋଷ ଥାନା ତାମଡ଼ା ଗୁଳିକାଣ୍ଡର ସିସିଟିଭି ଫୁଟେଜ ସାମ୍ନାକୁ ଆସିଛି। ଗତ ଶୁକ୍ରବାର ସନ୍ଧ୍ୟାରେ ଜଣେ ବ୍ୟବସାୟୀଙ୍କୁ ଗୁଳି ମାରି ଦୁଇ ଜଣ ଦୁର୍ବୃତ୍ତ ଫେରାର ହେଇ ଯାଇଥିଲେ। ପୋଲିସ ସିସିଟିଭି ଫୁଟେଜ ଜବତ କରି ତଦନ୍ତ କରୁଛି।

ସିସିଟିଭି ଫୁଟେଜରୁ ଜଣାପଡୁଛି, କେମିତି ଆସି ଦୁର୍ବୃତ୍ତ ଟଙ୍କା ମାଗିଲା, ଉତ୍ୟକ୍ତ ଦୋକାନୀ ଶଙ୍କର ତାକୁ ଦୋକାନରୁ ତଡ଼ି ଦେବା ପରେ ଅଭିଯୁକ୍ତ କେମିତି ଗୁଳି ଚଳାଇଲା, ଗୁଳି ବାଜିବା ପରେ ଆହତ ଦୋକାନୀ ଚେୟାରରେ ବସି ପଡ଼ିବା ଭଳି ସବୁ ଦୃଶ୍ୟ ସାମନାକୁ ଆସିଛି। ଏତେ ବଡ଼ ଅପରାଧର ଟେର ପୋଲିସ ଏଯାଏ ପାଇ ନାହିଁ। ପ୍ରାୟ ତିନି ସପ୍ତାହ ତଳେ ବଣାଇଁ ଏସ୍ ବି ଆଇ ଶାଖା ନିକଟରୁ ସାଢେ ଚାରି ଲକ୍ଷ ଟଙ୍କା ଲୁଟ ହୋଇଥିଲା। ବାହାଘର ପାଇଁ ଜଣେ ବ୍ୟକ୍ତି ଟଙ୍କା ଉଠାଇ ବାଇକ ଡିକିରେ ରଖିଥିବା ବେଳେ ଡିକି ଭାଙ୍ଗି ସବୁ ଟଙ୍କା ନେଇ ଯାଇଥିଲେ ଦୁର୍ବୃତ୍ତ।