ଭୁବନେଶ୍ୱର: ଭୁବନେଶ୍ୱର ଜିଲ୍ଲା ବିଜେପି ପରି ଖୋର୍ଦ୍ଧା ଜିଲ୍ଲା ବିଜେପିରେ ବି ତୀବ୍ର କନ୍ଦଳ । ସାଂସଦ ଅପରାଜିତା ଷଡ଼ଙ୍ଗୀଙ୍କ ବିରୋଧରେ ଏକଛତ୍ରବାଦ, ଦଳ ବିରୋଧୀ କାର୍ଯ୍ୟକଳାପ, ମନୋମୁଖୀ କାମ, ସମାନ୍ତରାଳ ସଙ୍ଗଠନ, କର୍ମକର୍ତ୍ତାଙ୍କୁ ଦୁର୍ବବ୍ୟହାର ନେଇ ପ୍ରଶ୍ନ କଲେ ଦଳରୁ ବିଦା କରିବାକୁ ଧମକ ଦେବା ଭଳି ଅଭିଯୋଗ ଆସିଛି । ରାଜ୍ୟର ନବନିଯୁକ୍ତ ପ୍ରଭାରୀ ସୁନୀଲ ବଂଶଲଙ୍କୁ ୫ ପୃଷ୍ଠାର ଲମ୍ବା ଅଭିଯୋଗ ଫର୍ଦ୍ଦ ଦେଇଛନ୍ତି ବେଗୁନିଆ-ବୋଲଗଡ଼ ନିର୍ବାଚନମଣ୍ଡଳୀର କର୍ମକର୍ତ୍ତା । ଅଭିଯୋଗ ପତ୍ରର ନକଲ ରାଷ୍ଟ୍ରୀୟ ସଭାପତି ଜେ. ପି ନଡ୍ଡା, କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉଦ୍ଦେଶ୍ୟରେ ଦିଆଯାଇଛି ।
ଯୁବମୋର୍ଚ୍ଚାକୁ ଭାଙ୍ଗିବା ପାଇଁ ’ୟୁଥ ଫର୍ ଆକ୍ସନ’, ମହିଳା ମୋର୍ଚ୍ଚାକୁ ଦୁର୍ବଳ କରିବା ପାଇଁ ’ଅଜିତା’ ଏବଂ କୃଷକ ମୋର୍ଚ୍ଚା ସଙ୍ଗନକୁ ନଷ୍ଟ କରିବାକୁ ’ସମର୍ଥ’ ଭଳି ନିଜସ୍ବ ସଙ୍ଗଠନ କରି ବିଜେପି ସଙ୍ଗଠନକୁ ସାଂସଦ ଅପରାଜିତା ଦୁର୍ବଳ କରୁଛନ୍ତି ବୋଲି ଅଭିଯୋଗ ହୋଇଛି । ସାଂସଦଙ୍କ ବାର୍ଷିକ ରିପୋର୍ଟରେ ବି ଅନେକ ମିଛ ତଥ୍ୟ ଦିଆଯାଇଛି । ଏହାର ବିଧିବଦ୍ଧ ତଦନ୍ତ କରିବାକୁ ବେଗୁନିଆ ବିଜେପିର ନେତୃବୃନ୍ଦମାନେ ଦାବି କରିଛନ୍ତି । ଖୋର୍ଦ୍ଧା ଜିଲ୍ଲା ସଭାପତି ରଶ୍ମିରଞ୍ଜନ ମହାପାତ୍ରଙ୍କୁ ହାତବାରିସୀ କରି କର୍ମୀଙ୍କୁ ସାଂସଦ ଖରାପ ବ୍ୟବହାର କରୁଛନ୍ତି ବୋଲି ଅଭିଯୋଗ ହୋଇଛି ।
ଏହା ସହ ଖୋର୍ଦ୍ଧା ଜିଲ୍ଲାରେ ସଙ୍ଗଠନ ବୈଠକ ବେଳେ ସାଂସଦ ଓ ଜିଲ୍ଲା ସଭାପତି ଅନୁପସ୍ଥିତ ରହୁଥିବା ବେଳେ ନିଜ କ୍ଷମତା ଜାହିର କରିବାକୁ କାହାକୁ କେତେବେଳେ ଦଳୀୟ ପଦବୀରୁ ବାହାର କରୁଛନ୍ତି ତ ପୁଣି କେତେବେଳେ ଦଳ ସହ ସମ୍ପର୍କ ନଥିବା ଲୋକଙ୍କୁ ଜିଲ୍ଲା କମିଟିରେ ସ୍ଥାନ ଦେଉଛନ୍ତି । ସାଂସଦଙ୍କ ଏପରି ମନମାନୀ ବିରୋଧରେ ଦଳୀୟ କର୍ମକର୍ତ୍ତାମାନେ ଏକଜୁଟ ହୋଇଛନ୍ତି ।
