ଝାରସୁଗୁଡ଼ା: କିଏ ପିନ୍ଧିବ ଝାରସୁଗୁଡ଼ା ମୁକୁଟ? କାହାକୁ ଭରସା କରିଛନ୍ତି ଝାରୁସୁଗୁଡ଼ାବାସୀ। ଶାନ୍ତି ଶୃଙ୍ଖଳାର ସହ ଶେଷ ହୋଇଛି ଝାରସୁଗୁଡା ଉପନିର୍ବାଚନ। ଇଭିଏମରେ ସିଲ୍ ୯ ପ୍ରାର୍ଥୀଙ୍କ ଭାଗ୍ୟ। କଡା ସୁରକ୍ଷା ବଳୟରେ ଷ୍ଟ୍ରଙ୍ଗରୁମରେ ଇଭିଏମକୁ ରଖାଯାଇଛି।
ଉପନିର୍ବାଚନରେ ୭୧.୨୯ରୁ ଅଧିକ ପ୍ରତିଶତ ଭୋଟିଂ ହୋଇଛି । ଭୋଟଦାନରେ ପୁରୁଷଙ୍କୁ ପଛରେ ପକାଇଛନ୍ତି ମହିଳା। ମୋଟ ଏକ ଲକ୍ଷ ୫୧ ହଜାର ୩୫ ଜଣ ମତଦାନ କରିଥିବାବେଳେ ସେମାନଙ୍କ ମଧ୍ୟରେ ୭୪ ହଜାର ୮ ଜଣ ପୁରୁଷ ଓ ୭୭ହଜାର ୨୦ଜଣ ମହିଳା ଭୋଟର ରହିଛନ୍ତି। କୌଣସି ସ୍ଥାନରେ ଭୋଟିଂ ପ୍ରଭାବିତ ହୋଇନାହିଁ। ଭୋଟିଂ ପରେ କଡ଼ା ସୁରକ୍ଷାରେ ଇଭିଏମକୁ ଷ୍ଟ୍ରଙ୍ଗ ରୁମରେ ରଖାଯାଇଛି। ବାହାରେ ପଇଁତରା ମାରୁଛି ସୁରକ୍ଷା ବାହିନୀ।
ଆସନ୍ତା ଶନିବାର ପ୍ରକାଶ ପାଇବ ଫଳାଫଳ। ରେଜଲ୍ଟ ଆସିବା ପୂର୍ବରୁ ନାନା ଆକଳନ କରିଛନ୍ତି ରାଜନୈତିକ ଦଳ ଓ ସମୀକ୍ଷକ। ରେକର୍ଡ ଭୋଟରେ ବିଜୟୀ ହେବା ନେଇ ବିଜେଡି ଦୃଢୋକ୍ତି ପ୍ରକାଶ କରିଛି। ପୂର୍ବ ଉପନିର୍ବାଚନ ଅପେକ୍ଷା ଏଥର ଅଧିକ ବ୍ୟବଧାନରେ ଦଳ ଜିତିବ ବୋଲି ଦମ୍ଭୋକ୍ତି କରିଛି। ସେପଟେ ବିଜେପି ଓ କଂଗ୍ରେସ ମଧ୍ୟ ଭଲ ପ୍ରଦର୍ଶନ କରିବାକୁ ଆଶା ରଖିଛନ୍ତି।
