ପୁରୀ: ଶ୍ରୀମନ୍ଦିର ଉପରୁ ଡ୍ରୋନ ଯୋଗେ ଭିଡିଓ ଉତ୍ତୋଳନ ଘଟଣାରେ ୟୁଟ୍ୟୁବର ଅନିମେଶ ଚକ୍ରବର୍ତ୍ତୀ ଗିରଫ। ଅନିମେଶଙ୍କୁ ପଶ୍ଚିମବଙ୍ଗରୁ ଗିରଫ କରିଛି ସିଂହଦ୍ୱାର ପୋଲିସ । ଆଜି ପୁରୀ ଜେଏମଏଫସିରେ ତାଙ୍କୁ ହାଜର କରାଯିବ । ଅଭିଯୁକ୍ତ ନାଁରେ ଏୟାରକ୍ରାଫ୍ଟ ଆକ୍ଟ, ଶ୍ରୀଜଗନ୍ନାଥ ମନ୍ଦିର ଆଇନ ଅନୁଯାୟୀ ଲାଗିଛି ସଙ୍ଗୀନ ଦଫା । ପୁରୀ ସିଟି ଡିଏସପି କେ. କେ. ହରିପ୍ରସାଦ ଏହି ସୂଚନା ଦେଇଛନ୍ତି ।
ଶ୍ରୀମନ୍ଦିର ଉପରେ ଡ୍ରୋନ ଉଡ଼ାଇ ଭିଡିଓକୁ ନିଜ ୟୁଟ୍ୟୁବ ପେଜରେ ଅପଲୋଡ କରିଥିଲେ ଅନିମେଶ। ଭିଡିଓ ବିକ୍ରି ପାଇଁ ଟଙ୍କା ମାଗୁଥିବା ଅଭିଯୋଗ ମଧ୍ୟ ହୋଇଥିଲା। ଏନେଇ ବିରୋଧ ହେବା ପରେ କ୍ଷମା ମାଗିଥିଲେ ଅନିମେଶ। ଆଇନ ବିଷୟରେ ନଜାଣି ଏପରି କରିଥିବା ସଫେଇ ଦେଇଥିଲେ ଅନିମେଶ। ପରେ ତାଙ୍କୁ ଗିରଫ କରି ତଦନ୍ତ କରିବାକୁ ଦାବି ହୋଇଥିଲା। ଶେଷରେ ତାଙ୍କୁ ଗିରଫ କରାଯାଇଛି।
