ଓଡ଼ିଶା ଶ୍ରମିକ ଆଇନରେ ସଂଶୋଧନ ନେଇ ତେଜିଲା ବିରୋଧ

ଓଡ଼ିଶା ସପ୍ ଆଣ୍ଡ କମର୍ସିଆଲ ଏଷ୍ଟାବ୍ଲିସମେଣ୍ଟ ଆକ୍ଟରେ ସଂଶୋଧନକୁ ନେଇ ବିବାଦ ଜୋର। ଶ୍ରମିକ ସଂଗଠନଗୁଡ଼ିକ ସହ ଆଲୋଚନା ନକରି କ୍ୟାବିନେଟ ମୋହର ପରେ ତେଜିଲା ବିବାଦ। ସରକାର ଶ୍ରମିକ ଶୋଷଣର ବାଟ ଫିଟାଇଛନ୍ତି ବୋଲି ଅଭିଯୋଗ କରିଛି ବିଜେଡି। ସଂଶୋଧିତ ନିୟମରେ ଶ୍ରମିକମାନେ ସେମାନଙ୍କ ହକ ନେଇ ସ୍ବର ଉତ୍ତୋଳନ କ୍ଷମତା ହରାଇବେ।ସନ୍ଧ୍ୟା ପରେ ମହିଳାଙ୍କୁ କର୍ମସ୍ଥାନରେ ରଖିବା ଦ୍ଵାରା ସେମାନଙ୍କ ସୁରକ୍ଷା ନେଇ ଉଠିଛି ପ୍ରଶ୍ନ।ଏଥିରେ ଶ୍ରମିକମାନେ ଅଧିକ କାମ କରିବାକୁ ବାଧ୍ୟ ହେବେ। ହେଲେ ପାରିଶ୍ରମିକ ନବଢିବାର ଆଶଂକା ଦେଖାଦେଇଛି।ଶ୍ରମିକ ଦିନକୁ ୮ ଘଣ୍ଟା କାମ କରିବାର ନିୟମ ରହିଛି। ପୂର୍ବରୁ ଓଭରଟାଇମ ନିୟମ ଥିଲେ ମଧ୍ୟ ଓଭରଟାଇମ ପାଉଣା ଦିଆଯାଉନି। EPF, ESI ନିୟମକୁ ଅଧିକାଂଶ ପାଳନ କରୁନାହାନ୍ତି। କାର୍ଯ୍ୟ ସମୟ ବୃଦ୍ଧି ନେଇ ସରକାରଙ୍କ ନିଷ୍ପତ୍ତି ଦ୍ଵାର ଶ୍ରମିକ ଅଧିକ ସମୟ କାମ କରିବେ କିନ୍ତୁ ପରିଶ୍ରମିକ ପାଇବେ ନାହିଁ। ଶ୍ରମିକଙ୍କୁ ମାଲିକମାନେ ଅଧିକ ଶୋଷଣ କରିବେ ବୋଲି ବିଜେଡି ଓ କଂଗ୍ରେସ ଅଭିଯୋଗ କରିଛନ୍ତି। ସରକାରଙ୍କ ନିଷ୍ପତ୍ତିକୁ ବିରୋଧ କରି ବିଭିନ୍ନ ଶ୍ରମିକ ସଂଗଠନ ଆନ୍ଦୋଳନ ଡାକରା ଦେଇଛନ୍ତି। ଏହି ନିଷ୍ପତ୍ତି ଦ୍ବାରା ସରକାରଙ୍କ କର୍ପୋରେଟ ପ୍ରୀତି ପଦାରେ ପଡ଼ିଥିବା କହିଛନ୍ତି ଶ୍ରମିକ ସଂଗଠନ। ପୂଜା ପରେ ବିରାଟ ଶ୍ରମିକ ଆନ୍ଦୋଳନ କରିବାକୁ ଅଣ୍ଟା ଭିଡ଼ିଛନ୍ତି ବିଭିନ୍ନ ଶ୍ରମିକ ସଂଗଠନ ।

ସଂଶୋଧିତ ନିୟମ ଦ୍ବାରା ନିଯୁକ୍ତି ବୃଦ୍ଧି ପାଇବ ବୋଲି ଶ୍ରମ ମନ୍ତ୍ରୀ ଯୁକ୍ତି ବାଢିଛନ୍ତି। ପୂର୍ବରୁ ଅଧିକ କାମର ପାରିଶ୍ରମିକ ମିଳୁ ନଥିଲା। ହେଲେ ଏବେ ମିଳିବ। ସେହିପରି ନାଇଟ ସିଫ୍ଟରେ କାମ କରୁଥିବା ମହିଳାମାନଙ୍କ ତାଲିକା ଓ ସ୍ବୀକୃତିପତ୍ର ଦାଖଲ କରିବେ କର୍ମ ସଂସ୍ଥାନ। ନିୟମ ଖିଲାଫ କଲେ କାର୍ଯ୍ୟାନୁଷ୍ଠାନ ହେବ। ସେପଟେ ସରକାରଙ୍କ ନିଷ୍ପତ୍ତିକୁ ସ୍ବାଗତ କରିଛି ଶିଳ୍ପ ସଂଘ।ରାତିରେ ମହିଳା କର୍ମଚାରୀଙ୍କୁ ନିୟୋଜିତ କଲେ ସେମାନଙ୍କ ସୁରକ୍ଷା ନେଇ ପଦକ୍ଷେପ ନେବା ଉଚିତ ବୋଲି କହିଛନ୍ତି ଉଦ୍ୟୋଗୀ ।  କେନ୍ଦ୍ରରେ ୪ଟି ଶ୍ରମ ସଂହିତା ଆଣିଥିଲେ। କରୋନା ଭଳି ବିପଦ ସମୟରେ ସଂସଦରେ ଆଲୋଚନା ନକରି ଏହାକୁ ଆଇନର ରୂପ ଦିଆଯାଇଛି। ହେଲେ ଏହାକୁ ନେଇ ଲଗାତର ବିରୋଧ ବିରୋଧ ଫଳରେ ଏପର୍ଯ୍ୟନ୍ତ ସିଧାସଳଖ ଲାଗୁ କରାଯାଇ ପାରିନାହିଁ।