ବ୍ରହ୍ମପୁର : ଚକାଚକ କୋଠା । ରହିଛି ସମସ୍ତ ବ୍ଯବସ୍ଥା । ହେଲେ କାମରେ ଆସୁ ନଥିବାରୁ ଏକବର୍ଷ ହେଲା ଶୂନଶାନ୍ । ଏଇ ହେଉଛି ବ୍ରହ୍ମପୁର ଆଙ୍କୁଶପୁର ନିକଟରେ ତିଆରି ହୋଇଥିବା ୱାର୍କିଂ ୱିମେନ୍ସ ହଷ୍ଟେଲ । ପୂର୍ବରୁ ବ୍ରହ୍ମପୁର ସହର ଭିତରେ ଥିଲା କର୍ମଜୀବୀ ମହିଳା ନିବାସ । ୧୯୯୦ରେ ଜିଲ୍ଲା ଜଜ୍ ବାସଭବନ ସମ୍ମୁଖରେ ନିର୍ମାଣ ହୋଇଥିବା ଏହି ନିବାସ ଥିଲା ରାଜ୍ୟରେ ପ୍ରଥମ । ୪୨ ଶଯ୍ୟା ବିଶିଷ୍ଟ ହଷ୍ଟେଲ ବ୍ରହ୍ମପୁର ମହାନଗର ନିଗମ ଦ୍ବାରା ପରିଚାଳିତ ହେଉଥିଲା । ତେବେ ଏହା ଜରାଜିର୍ଣ୍ଣ ହେବା ପରେ ପୂର୍ବ ସରକାରଙ୍କ ସମୟରେ ସହର ଉପକଣ୍ଠ ଆଙ୍କୁଶପୁର-ମସିହାଖାଲି ରାସ୍ତାରେ ୨୦୨୩ ରେ ଇଡ୍କୋ ପକ୍ଷରୁ ୧୧ ଏକର ଜମିରେ ୫ କୋଟି ଟଙ୍କା ଖର୍ଚ୍ଚକରାଯାଇ ନୂଆ ହଷ୍ଟେଲ ନିର୍ମାଣ ହୋଇଛି । ଏହି ମହିଳା ନିବାସରେ ୯ଟି କୋଠାରୀରେ ଜଣେ ଲେଖାଏଁ, ୨୮ ଟି ରେ ଦୁଇଜଣ ଲେଖାଏଁ ଓ ୯ଟି କୋଠାରୀରେ ୪ଜଣ ଲେଖାଏଁ ରହିବାର ବ୍ଯବସ୍ଥା ରହିଛି । ତେବେ ସହର ଠାରୁ ୫ କିଲୋମିଟର ଦୂରରେ ଥିବାରୁ ଏଠାକୁ କୌଣସି ମହିଳା କର୍ମଚାରୀ ଆସୁ ନାହାନ୍ତି । ଏକବର୍ଷ ହେଲା ମାତ୍ର ୧୨ ଜଣ ଏଠାରେ ରହୁଛନ୍ତି ।
ମହିଳା ନିବାସରେ ବିଶୁଦ୍ଧ ପାନୀୟ ଜଳ, ରୋଷେଇ ଘର, ଖାଇବା ଘର, ଷ୍ଟୋର୍ ରୁମ୍, ଅଗ୍ନି ନିରାପତ୍ତା ସୁବିଧା, ୨୪ ଘଣ୍ଟିଆ ସିସିଟିଭି ସହିତ ସୁରକ୍ଷା କର୍ମୀଙ୍କୁ ନିୟୋଜନ କରାଯାଇଛି । ୨୦୨୪ ସେପ୍ଟେମ୍ବରରେ ମହିଳା ଗୃହର ନିର୍ମାଣ କାର୍ଯ୍ୟ ସରିଛି । ଏଠାରେ ରହିବା ପାଇଁ ଜିଲ୍ଲା ପ୍ରଶାସନ ତରଫରୁ ବିଭିନ୍ନ ବିଭାଗକୁ ଗତ ୨୦୨୪ ନଭେମ୍ବର ୨୨ ତାରିଖରେ ଚିଠି କରାଯାଇଛି। କିନ୍ତୁ ପ୍ରାୟ ବର୍ଷେ ପରେ ମଧ୍ୟ ଏଠାରେ ରହିବାକୁ କେହି ଆବେଦନ କରୁ ନାହାନ୍ତି । ତେବେ ଏଦିଗରେ ତୁରନ୍ତ କିଛି ପଦକ୍ଷେପ ନିଆଯିବ ବୋଲି କହିଛନ୍ତି ବିଇଏମସି କମିଶନର ।
